Polonia paralajmëron: “Do ta ndalojmë Putinin nëse kalon në territorin tonë”
Një gjykatë mund të urdhërojë shoqërimin e tij në Hagë.
Polonia i ka bërë thirrje presidentit rus Vladimir Putin të mos fluturojë në hapësirën e saj ajrore për një samit të planifikuar në Budapest me presidentin e SHBA-së Donald Trump, duke përmendur një urdhër-arresti të lëshuar nga Gjykata Ndërkombëtare Penale (ICC). Ministri i Jashtëm polak, Radoslaw Sikorski, deklaroi se vendi mund të jetë i detyruar ligjërisht të ndalojë Putinin nëse ai hyn në territorin polak.
“Nuk mund të garantoj se një gjykatë e pavarur polake nuk do t’i urdhërojë qeverisë të shoqërojë një avion të tillë për t’ia dorëzuar të dyshuarin gjykatës në Hagë,” tha Sikorski.
Gjykata Penale Ndërkombëtare lëshoi urdhër-arrestin në vitin 2023, duke akuzuar Putinin për deportimin e paligjshëm të qindra fëmijëve ukrainas gjatë luftës. Rusia mohon akuzat dhe nuk e pranon juridiksionin e gjykatës.
Hungaria, ku do të mbahet samiti, ka premtuar se do t’i lejojë Putinit të hyjë dhe të dalë nga vendi në mënyrë të sigurt. Megjithatë, për të shmangur fluturimin mbi Ukrainë, delegacioni rus ka të ngjarë të duhet të kalojë hapësirën ajrore të të paktën një shteti anëtar të BE-së, të cilat të gjitha njohin juridiksionin e GJPN-së.
Polonia, një vend anëtar i NATO-s dhe mbështetëse e fortë e Kievit që nga pushtimi i Rusisë në vitin 2022, ka vënë në dukje rreziqet ligjore dhe sugjeron që duhet të përdoret një rrugë alternative.