“`html
Asgjë e re nga fronti i SelfCare
Sot shënohet dita e 15-të e bllokimit të sistemit të fiskalizimit SelfCare, i cili, sipas ekonomistëve dhe bizneseve, nuk ka mundur të funksionojë siç duhet që nga data 20 janar. Pavarësisht njoftimeve nga AKSH (Agjencia Kombëtare e Standardeve dhe Informatizimit) dhe Tatimet për rivendosjen e funksionimit të sistemit, bizneset dhe ekonomistët vazhdojnë të shprehin shqetësimin për mospërdorimin e tij të rregullt.
Aktualisht, platforma e fiskalizimit SelfCare, e cila funksionon përmes portalit e-Albania, nuk lejon kryerjen e operacioneve të hyrje-daljeve. Megjithëse fiskalizimi kryhet, faturat nuk mund të shtypen dhe po menaxhohen në mënyrë manuale nga zyrat e financës.
“Që nga data 20 janar sistemi është i bllokuar dhe nuk funksionon fare. Nuk kryhen dot veprime hyrje-dalje (as jep as merr). Fiskalizimi kryhet, por nuk është e mundur shtypja nga portali; faturat po shtypen manualisht nga financa. Problemi vazhdon edhe sot, pa asnjë përmirësim”, pohon Suela, ekonomiste pranë një kompanie biznesi.
Të vetëpunësuarit e vetëm janë ata që po pengohen më shumë në aktivitetin e tyre nga ky mosfunksionim. SelfCare është platforma e fiskalizimit, ofruar nga Administrata Tatimore, e cila mundëson procesin e fiskalizimit të faturave të shitjes, deklaratave doganore, ngarkimin e certifikatës së fiskalizimit dhe ndryshimet në të.
Në mënyrë jozyrtare, mësohet se të vetëpunësuarve të vetëm u është sugjeruar blerja e shërbimeve me pagesë pranë kompanive private si një alternativë për zgjidhjen e problemit. Sipas INSTAT, në vend ka rreth 40 mijë biznese të vetëpunësuar, ose rreth 30% e totalit, por nuk ka të dhëna se sa prej tyre janë të vetëpunësuar të vetëm. Aktiviteti i këtyre të fundit është tërësisht i bllokuar prej gati 3 javësh.
Nëse të vetëpunësuarit e vetëm do të detyrohen të blejnë pajisje për lëshimin e faturave të fiskalizimit, kjo pritet të sjellë kosto shtesë për këtë kategori.
Më 29 janar, Tatimet njoftuan se problematika e konstatuar në aksesimin e Platformës Qendrore të Lëshimit të Faturave të Fiskalizuara ishte zgjidhur dhe se platforma funksiononte normalisht që prej pasdites së 28 janarit. Pavarësisht këtij njoftimi, shumë subjekte raportuan për probleme, të cilat vazhdojnë edhe sot.
“Nxitimi për të përgënjeshtruar problemet e pazgjidhura thjesht do të thellojë mosbesimin në infrastrukturën kritike dhe aftësinë e shtetit për të justifikuar shpenzimet e larta të buxhetit të shtetit për shërbime që lënë për të dëshiruar”, shkroi më herët një lexues.
Një shqetësim tjetër i bizneseve lidhet me inventarin. Administrata Tatimore u ka kërkuar bizneseve të dorëzojnë inventarët deri në fund të janarit.
“`