“`html
Tiranë, mes tregjeve më të shtrenjta: Qiratë e zyrave në kullat e biznesit arrijnë deri në 40 euro/m²
Çmimet e qirave për zyra në Tiranë po vazhdojnë të rriten në segmentin premium. Në disa prej projekteve më të mëdha, qiratë kanë arritur deri në 40 euro për metër katror në muaj. Sipas të dhënave të tregut të pasurive të paluajtshme, nivelet më të larta të qirave regjistrohen në godinat dhe kullat e biznesit, të cilat janë në zhvillim ose të sapopërfunduara në zonën e qendrës.
Konkretisht, të dhënat e agjencisë ndërkombëtare për pasuritë e paluajtshme “Colliers International Albania”, tregojnë se në projektet pranë zonës së ish-Sheratonit (në fazë zhvillimi), çmimi maksimal i qirasë për zyra ka arritur 40 euro për metër katror, duke shënuar kështu nivelin më të lartë në Tiranë.
Në komplekse të tjera, si “MET Tirana Building”, çmimi ka arritur 33 euro për metër katror. Për vitin 2025, çmimet e qirave për zyra në këtë godinë varionin nga 20 deri në 30 euro për metër katror. Ndërsa në kullën “Downtown One”, çmimi maksimal zbret në 25 euro për metër katror, nga 30 euro për metër katror që kishte arritur në vitin 2025.
Agjentët imobiliarë raportojnë rritje çmimesh edhe në objekte të tjera si “ETC Business Tower”, “Twin Towers” dhe “Ring Center”. Stela Dhami nga agjencia imobiliare “Colliers International Albania” sqaron se rritja e kostove të ndërtimit, zhvlerësimi i monedhës euro, zhvillimet e reja urbane dhe kërkesa për standarde më të larta të hapësirave të punës janë ndër faktorët kryesorë që ndikojnë në ecurinë e çmimeve në këtë segment të tregut.
Në këto projekte, çmimet e qirasë mbeten më të lartat në treg për shkak të:
- Lokacionit të favorshëm.
- Standardeve të larta të ndërtimit.
- Administrimit profesional.
- Shërbimeve të përbashkëta të ofruara.
Një pjesë e këtyre projekteve vijojnë të jenë ende në fazë ndërtimi ose përfundimi. Burime nga tregu imobiliar theksojnë se kërkesa për hapësira zyrash moderne mbetet e qëndrueshme, veçanërisht nga kompanitë që kërkojnë ambiente në godina të reja dhe në zona kryesore biznesi.
Ndryshe nga segmenti premium, në pjesën tjetër të tregut të zyrave në Tiranë, qiratë mbeten më të ulëta dhe ndryshojnë në varësi të zonës dhe cilësisë së objektit, duke mos arritur nivelet e projekteve premium.
Tendenca rritëse e çmimeve për qiratë e zyrave në kullat e biznesit pritet të sjellë një rritje të çmimit mesatar të qirasë për vitin 2026 për zonën e qendrës.
Në gjashtëmujorin e dytë të vitit 2025, sipas të dhënave të raportit të “Colliers Albania”, çmimet mesatare të qirave për ambientet e zyrave në zonat qendrore arritën 30 euro për metër katror në muaj, duke u barazuar kështu me ato të Barcelonës dhe Pragës, dy tregje të konsoliduara në Europë.
Tirana u rendit jo vetëm ndër qytetet më të shtrenjta në rajon, por edhe më lart se disa qytete të Bashkimit Europian. Në Tiranë, çmimet e qirave tejkaluan kryeqytete europiane si:
- Portualia, ku vlera shënon 29 euro.
- Budapesti, me çmime 25.5 euro.
- Bukureshti, me çmime mesatare 20 euro për metër katror në muaj.
Çmimet e qirave për zyra në vitin 2025 ishin më të larta edhe sesa kryeqytetet e rajonit:
- Në zonat qendrore të Beogradit, çmimet arritën 18 euro për metër katror në gjashtëmujorin e parë të vitit 2025.
- Në Zagreb të Kroacisë, çmimet ishin 17.5 euro.
- Në Sofje të Bullgarisë, çmimet ishin 16 euro për metër katror në muaj.
Tirana u pozicionua gjithashtu ndër qytetet më të shtrenjta edhe për çmimet e qirave në zonat sekondare. Me një mesatare prej 19 euro për metër katror në muaj, kryeqyteti shqiptar në vitin 2025 tejkaloi disa qytete të rajonit si Beogradi (15 euro), Zagrebi (13 euro) dhe Sofia (11 euro)./ D.Azo
“`