“`html
Rama fton opozitën për pakte politike në Kuvend: I quani vendin tonë “narkoshtet”, bëni zhurmë kot! Nëse dëshironi të bashkëpunojmë, mirëpritur! Ne nuk do t’ju presim
Botuar më 16.01.2026 nga shekulli_admin
Gjatë mandatit aktual, Kryeministri Edi Rama deklaroi se do të ngrihet një grup për ndryshimet kushtetuese.
“Duhet të mendohet edhe ngritja e një grupi nismëtar për ndryshimet kushtetuese. Kemi theksuar nevojën që Kuvendi i Shqipërisë të zvogëlohet në numër; kemi një Kuvend me 140 anëtarë, por fare mirë mund të kemi një Kuvend me 100 anëtarë,” tha Rama.
Ai shtoi se ka aspekte të vështira që duhen zgjidhur nga njerëz të ditur. “Kur vjen fjala te kushtetuta e Shqipërisë, duhet ngritur një grup që pastaj të hapë një proces. Kjo është shumë më tepër se një reformë zgjedhore, kërkon shumë më tepër angazhim dhe burime. Ambicia duhet të jetë që në fund të mandatit të kalojmë edhe një reformë kushtetuese,” tha Rama.
“Dua të ecim me shumë vendosmëri në integrimin sa më të thellë të teknologjisë në punën e Kuvendit, me të gjitha ato që janë thënë. E kemi thënë edhe herë të tjera, unë mendoj që kanali i parlamentit në televizionin shqiptar duhet të kthehet në një kanal parlamentar, jo thjesht për të transmetuar seancat e Kuvendit. Vende të tjera kanë një kanal parlamentar, duhet ta kemi edhe ne. Kjo do të bëhet nën kujdesin e Kryesisë së Kuvendit, duke ftuar patjetër edhe përfaqësuesin e opozitës,” shtoi më tej Rama.
Kryeministri Edi Rama foli gjithashtu edhe për nevojën e bashkëpunimit me opozitën.
“Ne nuk do të presim për asnjë rast për të vazhduar punën tonë. E mirëkuptoj thirrjen e miqve partnerë, predikuesve të dialogut dhe bashkëpunimit. Ne jemi të gatshëm, por bashkëpunim, dialog dhe ulje në një tavolinë të përbashkët nuk kam parë. Prandaj, për ne është e rëndësishme të mos mbyllim kurrë derën, të mos lëmë karriget e tyre bosh dhe t’i largojmë siç i digjnin ata. Karriget bosh janë aty, duan të vijnë, le të ulen. Duan të bashkëpunojnë, mirëpritur, duan të japin alternativë, mirë se po. Për të tjerat, rrugët janë të ndara: ne përpara, ata mbrapa; ne gjithmonë e më përpara, ata edhe më mbrapa. Sa më mbrapa të mbeten, aq më e fortë do të jetë jehona e zhurmës së tyre,” tha ai.
Kryeministri Edi Rama u ndal gjithashtu edhe te paralajmërimi i Partisë Demokratike se do të bojkotojë Komisionet e Posaçme për Reformën Zgjedhore dhe atë të Territoriales. Ai ironizoi teksa tha se sa herë mbyllen zgjedhjet, nevojitet një reformë zgjedhore, por humbësi është gjithmonë i njëjti, duke iu referuar PD-së.
“Duke e mbyllur me reformën zgjedhore dhe atë territoriale, fjala ime është që me ata, pa ta, puna do të vazhdojë po aq mirë. Rëndësi ka të bëhet puna. Asnjë lloj force nuk na imponon dot ne që me vetëdije të bëjmë peng procesin. Jo! Reforma zgjedhore ka nisur, ose në fakt ka nisur që kur isha akoma thjesht dhe vetëm piktor, nën ujërat e Parisit, siç e keni dëgjuar. Që atëherë komisionet
bipartizane takoheshin, por atëherë i bënin te OSBE. Nuk di çfarë të them. Sa herë mbarojnë zgjedhjet duhet një reformë, sepse pas zgjedhjeve ka një humbës. Humbësi është po ai dhe rezultati është keq e më keq. Damiani e di pozicionin tim; kemi bërë një reformë zgjedhore unike në botën demokratike. I sfidoj të gjithë se ku është kjo që qeveria ndalon së marruri frymë 4 muaj para zgjedhjeve, që çdo gjë ndalon. Dhe prapë nuk iu mjafton, tani duan 9 muaj. Por prapë edhe 9 muaj po të bëhet nuk do të lindë fitorja. Megjithatë, Damian, ti e di vetë, siç thoshte kryetari ynë (të ketë ndjesë) ‘bëni sic keni bërë gjithmonë’. Për reformën territoriale, kemi të qartë drejtimin, më pak apo më shumë. Fjala kyçe e fundit është koordinimi,” u shpreh Rama.
“`