Rama vijon nismën për reduktimin e numrit të deputetëve në 100
Kryeministri Edi Rama, gjatë mbledhjes së grupit parlamentar të Partisë Socialiste, ka akuzuar opozitën dhe Partinë Demokratike se po pengojnë përpjekjet e qeverisë për integrimin në Bashkimin Europian.
“Puna jonë nuk pret. Do ishte më se e mirë nëse të tjerët do të ishin të interesuar të bënin të njëjtën punë për integrimin në BE. Nuk janë të interesuar, përkundrazi angazhohen që me çdo mjet të përcjellin jashtë kufijve të Shqipërisë një imazh negativ, duke e paraqitur vendin si narkoshtet,” u shpreh Rama.
Ai shtoi se mazhoranca është e gatshme të bashkëpunojë, por opozita nuk ka shfaqur dëshirë për dialog të sinqertë. “Asnjëherë nuk mbyllim derën. Duan të japin alternativë, le të vijnë. Për të tjerat rrugët ndahen: ne përpara, ata mbrapa. Sa më mbrapa të mbeten, aq më e fortë do të vijë jehona e tyre,” tha Rama, duke përdorur një metaforë për të përshkruar veprimet e opozitës.
Kryeministri gjithashtu propozoi krijimin e një grupi nismëtar për ndryshime kushtetuese, duke theksuar se Parlamenti shqiptar mund të racionalizohet në numër. “Kemi një parlament me 140 veta dhe fare mirë mund ta kishim me 100 veta. Publiku do ta mirëpriste këtë dhe do të racionalizonte forcat,” tha Rama.
Fjalimi i tij vjen në një kohë kur qeveria po përballet me kritika nga opozita dhe partnerët ndërkombëtarë mbi funksionimin e institucioneve dhe transparencën në vendimmarrje, duke treguar angazhimin e mazhorancës për reforma dhe modernizim të strukturave parlamentare.