“`html
Rama refuzon sërish autorizimin e kërkuar nga SPAK për arrestimin e Ballukut
Kryeministri Rama ka vendosur të refuzojë sërish autorizimin e kërkuar nga SPAK për arrestimin e Belinda Ballukut. Ai e ka bërë të qartë këtë qëndrim në një deklaratë pas mbledhjes së grupit parlamentar të PS, duke argumentuar se “nuk ka asnjë urgjencë për të trajtuar kërkesën që SPAK-u bëri pas rënies së masës së pezullimit” të Belinda Ballukut nga detyra.
Kjo do të thotë se Kuvendi do të vazhdojë të zvarrisë kërkesën e SPAK, edhe pse më herët, Rama kishte caktuar si afat marrjen e një vendimi nga Gjykata Kushtetuese. Qëllimi mbetet i njëjtë: që kërkesa e SPAK për arrestimin e Belinda Ballukut të rrëzohet për shkak të tejkalimit të afatit prej 3 muajsh, të parashikuar nga rregullorja e Kuvendit, i cili përmbushet në datën 16 mars.
Preteksti i radhës që ka gjetur kryeministri Rama për të shtyrë votimin për autorizimin e SPAK për arrestimin e Ballukut lidhet me një ndërhyrje në Kodin e Procedurës Penale, ku do të sanksionohet se një anëtar i qeverisë nuk mund të pezullohet nga gjykata.
Tre konkluzione nga mbledhja e Grupit Parlamentar pas mosvendimit të Gjykatës Kushtetuese dhe rivendosjes së pezullimit të ministres janë:
- “Sepse pezullimi paralizon funksionin, pra institucionin që ai/ajo drejton”, shkruan kryeministri në statusin e tij në rrjetet sociale.
- Funksionet e padelegueshme kushtetuese, nga ai i anëtarit të qeverisë tek ai i Presidentit të Republikës dhe jo vetëm, nuk mund të pezullohen kurrsesi nga askush, pasi pezullimi paralizon funksionin dhe institucionin përkatës.
- Duke u bazuar edhe në leximin e deklaratës publike të Gjykatës Kushtetuese, ku të gjithë anëtarët shfaqen unanimë lidhur me problemin, por ndahen tek rrugëzgjidhja, grupi parlamentar socialist do të angazhohet për zgjidhjen përmes ndërhyrjes në legjislacion.
Kryeministri vijon duke theksuar se e vetmja palë e përmbushur nga rikthimi i pezullimit është SPAK-u, i cili në kushtet e pezullimit mund të vazhdojë qetësisht hetimin përkatës, ndërkohë që deri në adresimin ligjor të zgjidhjes nuk ka asnjë urgjencë për të trajtuar kërkesën e SPAK bërë pas rënies së masës së pezullimit.
Si shtesë, theksohet se SPAK-u nuk preket, por vetëm mbështetet. Liria dhe e drejta e çdo prokurori për të hetuar çfarëdoqoftë dhe këdoqoftë nuk preken, por vetëm garantohen. Pavarësia kushtetuese e pushtetit legjislativ dhe ekzekutiv gjithashtu nuk preken, por vetëm garantohen.
“`