Të huajt shpenzuan një rekord prej 5.7 miliardë eurosh në Shqipëri në 2025-n; 460 euro për turist
Edhe pse ritmet e hyrjes së shtetasve të huaj u ngadalësuan ndjeshëm në vitin 2025, dhe operatorët turistikë raportuan një rënie të shpenzimeve nga turistët, duke theksuar mbërritjen kryesisht të personave të rinj me mjete të kufizuara, të dhënat e Bankës së Shqipërisë tregojnë një realitet tjetër.
Sipas statistikave të bilancit të pagesave, të cilat përfshijnë edhe udhëtimet, shpenzimet e të huajve në Shqipëri shënuan një rritje të konsiderueshme në vitin 2025, duke arritur një rekord prej 5.7 miliardë eurosh. Kjo përfaqëson një rritje prej 15% krahasuar me vitin paraardhës. Megjithatë, krahasuar me vitet e mëparshme, ritmet e rritjes janë ngadalësuar. Në vitin 2024, të ardhurat nga turistët u rritën me 19.6%, ndërsa në vitin 2023 rritja ishte rreth 47%.
Të dhënat e tjera nga INSTAT tregojnë se në vitin 2025, në vend hynë 12.46 milionë shtetas të huaj, me një rritje minimale prej 6.3%, niveli më i ulët që nga periudha e pandemisë. Në vitet 2023 dhe 2024, rritja përkatëse ishte 15.2% dhe 34.6%.
Krahasimi mes numrit të hyrjeve dhe të ardhurave tregon se shpenzimi mesatar për një të huaj në vitin 2025 ishte 460 euro, nga 427 euro një vit më parë. Rekordi i shpenzimeve u shënua gjatë kulmit të sezonit, në tremujorin e tretë, me 2.3 miliardë euro, krahasuar me 1.9 miliardë euro në të njëjtën periudhë të vitit paraardhës.
Edhe shqiptarët jashtë shpenzojnë më shumë
Edhe shqiptarët po udhëtojnë më shumë, falë rritjes së destinacioneve dhe çmimeve më të favorshme për fluturimet nga Rinas. Në vitin 2025, ata shpenzuan jashtë vendit 3 miliardë euro, një nivel rekord, me një rritje vjetore prej 14.8%. Sipas INSTAT, në vitin 2025 u regjistruan 8.6 milionë dalje nga shtetasit shqiptarë, me një rritje prej 9%.
Në Shqipëri mbesin 2.7 miliardë euro
Dy dekada më parë, shpenzimet e shqiptarëve jashtë vendit ishin pothuajse të barabarta me ato të të huajve në Shqipëri. Megjithatë, zhvillimi i turizmit në vitet e fundit ka bërë që bilanci i udhëtimeve të jetë dukshëm pozitiv, duke u kthyer në një burim të rëndësishëm të hyrjes së valutës në vend.
Në vitin 2025, sipas të dhënave të Bankës së Shqipërisë, bilanci neto i udhëtimeve, që mat diferencën mes prurjeve të të huajve dhe shpenzimeve të shqiptarëve jashtë, ishte 2.7 miliardë euro. Për krahasim, një dekadë më parë, ky bilanc ishte gjithashtu pozitiv, por në një vlerë shumë më të ulët, 237 milionë euro.
Burimi: Banka e Shqipërisë