“`html
Numri i pagesave me para elektronike pësoi rënie në 2025
Numri i pagesave me para elektronike pësoi rënie vitin e kaluar. Statistikat e Bankës së Shqipërisë tregojnë se vitin e kaluar numri i veprimeve me para elektronike zbriti në 12.74 milionë, duke shënuar një ulje prej 13.4% krahasuar me një vit më parë.
Megjithatë, në vlerë, pagesat me para elektronike u rritën në 95.27 miliardë lekë, duke regjistruar një rritje prej 9.6% krahasuar me një vit më parë.
Pagesa me para elektronike në sportelet e Institucioneve Financiare të Parasë Elektronike është një formë pagese e ngjashme me pagesën me kartë bankare. Ndryshimi kryesor është se këto transaksione nuk kryhen nëpërmjet kartave dhe POS-eve të sektorit bankar, por përmes infrastrukturës së institucioneve të licencuara të parasë elektronike.
Vlerësohet se pjesa dërrmuese e veprimeve me para elektronike janë ende të lidhura me veprime në para cash. Kjo përfshin format e ndryshme të pagesave që qytetarët kryejnë nëpërmjet sporteleve fizike të parasë elektronike në formë cash, të cilat më tej ekzekutohen nga agjentët e këtyre institucioneve nëpërmjet llogarive të tyre të parasë elektronike.
Për të dhënë një shembull të thjeshtë, nëse paguani një faturë pranë një institucioni pagesash, veprimi klasifikohet si pagesë me para elektronike, megjithëse konsumatori e kryen atë në formë cash. Në këtë rast, edhe pse shlyerja për përfituesin bëhet nëpërmjet llogarive të parasë elektronike, pagesa nga konsumatori fundor bëhet në para fizike, duke bërë që cikli i pagesës të mos jetë plotësisht dixhital.
Gjithashtu, një nga institucionet e reja të parasë elektronike e lidh hapjen e llogarive të parasë elektronike me disbursimin e kredive nga një kompani simotër e mikrokredive konsumatore. Realisht, kjo rritje i detyrohet në thelb produktit të kredisë dhe jo shërbimit të pagesës.
Mundësimi i pagesave nëpërmjet pikave të agjentëve ka qenë një hap pozitiv krahasuar me situatën para zhvillimit të kësaj forme pagese, pasi u ka dhënë klientëve mundësinë të kryejnë pothuaj të gjitha pagesat për shërbime apo produkte në një sportel të vetëm.
Megjithatë, institucionet e parasë elektronike në vitet e fundit kanë zhvilluar tashmë platforma që mundësojnë një cikël të plotë të kryerjes së pagesës elektronike për një spektër të gjerë pagesash, duke krijuar një model të mirëfilltë fintech. Aplikacionet e tyre ofrojnë mundësinë për klientët të kryejnë pagesa në çast dhe të marrin shërbimin gjithashtu në çast, falë integrimit me sistemet e kompanive që ofrojnë shërbimin në fjalë.
Të dhënat e Bankës së Shqipërisë tregojnë se aktualisht në vend veprojnë 10 institucione të licencuara të parasë elektronike. Shumica e tyre janë licencuar pas vitit 2021, me miratimin e ligjit të ri për shërbimet e pagesave.
“`