Rrëshqitje masive dheu në një kanal në Angli, rreth 10 persona të bllokuar në varka
Autoritetet në Shropshire, Angli, kanë shpallur alarm pas një rrëshqitjeje të madhe dheu që ka ndodhur në një kanal të zonës, duke rezultuar në bllokimin e disa anijeve.
Incidenti ka krijuar një gropë të madhe në kanal, ndërsa niveli i ujit është ulur ndjeshëm, duke u tharë pothuajse plotësisht në atë segment. Sipas raportimeve të BBC, për shkak të rrëshqitjes së dheut, anijet nuk kanë mundur të lëvizin dhe kanë mbetur të bllokuara.
Të paktën 10 persona janë shpëtuar nga anijet pas ndërhyrjes së shërbimeve të emergjencës. Zjarrfikësit dhe ekipet e tjera të shpëtimit kanë shkuar menjëherë në vendngjarje për të menaxhuar situatën dhe për të garantuar sigurinë e personave të përfshirë.
Policia konfirmoi se nuk ka raportime për persona të lënduar.
Autoritetet u kanë bërë thirrje qytetarëve të shmangin zonën e prekur dhe të përdorin rrugë alternative, ndërsa vijojnë kontrollet dhe vlerësimi i dëmeve. Hetimet për shkaqet e rrëshqitjes së dheut janë ende në proces.