“`html
BSH: Bregdeti po shtyn rritjen e çmimeve të pronave, Tirana po ngadalësohet
Banka e Shqipërisë vlerëson se çmimet e banesave kanë vijuar të rriten me ritme të larta në gjashtëmujorin e dytë të vitit të kaluar. Indeksi Fischer, i përllogaritur nga Banka e Shqipërisë, tregoi se çmimi mesatar i banesave të shitura gjatë periudhës u rrit me 11.7% në krahasim me gjashtëmujorin e kaluar dhe me 28% në krahasim me një vit më parë.
Megjithatë, rritja vjetore e çmimeve u ngadalësua nga niveli prej 41.7% i raportuar në gjashtëmujorin e parë të vitit 2025. Për kryeqytetin në veçanti, tregu shfaqet në një fazë ngadalësimi të ndjeshëm. Indeksi i çmimeve për shitjet në Tiranë u raportua i pandryshuar në krahasim me gjashtëmujorin e mëparshëm dhe u rrit me 4.4% në krahasim me një vit më parë. Rritja e çmimeve me bazë vjetore pësoi një rënie drastike nga niveli prej 32.6% i gjashtëmujorit të parë të vitit 2025.
Banka e Shqipërisë vlerëson se kontributi kryesor në rritjen e vlerës së indeksit të përgjithshëm të çmimeve e ka dhënë rritja e indeksit të llogaritur për zonat bregdetare. Në krahasim me gjashtëmujorin e kaluar dhe me një vit më parë, peshat e transaksioneve për të cilat çmimi i blerjes së pronës ka qenë i njëjtë ose deri në 5% më i ulët se çmimi i kërkuar nga shitësi, kanë peshë të ngjashme me gjashtëmujorin e parë.
Koha mesatare e shitjes së banesave në rang vendi ra në 9.1 muaj, nga 11.6 muaj në vrojtimin e mëparshëm. Në rastin e Tiranës, koha mesatare e shitjes u ul ndjeshëm, në 8.1 muaj nga 11.1 muaj. Koha mesatare për shitjet në zonat bregdetare u rrit në 9.9 muaj nga 8.7 muaj, ndërsa për zonat e tjera kohëzgjatja e shitjes rezultoi më e ulët se në gjashtëmujorin e kaluar, duke rënë në 10.1 muaj nga 12.8 muaj.
Financimi nëpërmjet kredisë bankare ka vijuar të shoqërojë një pjesë të mirë të shitjeve të pronave. Sipas agjentëve, rreth 61% e pronave për banim dhe atyre për përdorim tregtar të shitura prej tyre janë blerë me hua bankare. Nga këto, në 38% të rasteve kredia ka mbuluar deri në 60% të vlerës.
Gjatë gjashtëmujorit të dytë të vitit 2025, rreth 25% e banesave të shitura janë raportuar të blera nga shtetas jorezidentë. Nga këta, rreth 52% rezultojnë shtetas të vendeve të BE-së. Në tërësi, pesha e transaksioneve në të cilat blerësit janë jorezidentë ka shfaqur një prirje në rritje gjatë 5 viteve të fundit.
Banka e Shqipërisë raporton se gjithashtu çmimet e qirasë, sipas agjentëve, kanë shënuar rritje gjatë gjashtëmujorit të dytë të vitit 2025. Informacioni mbi kërkesën dhe çmimet e qirasë vjen kryesisht nga agjentët që kryejnë aktivitet në zonën e kryeqytetit. Sipas tyre, kërkesa e përgjithshme për marrje me qira raportohet më e lartë se kërkesa e gjashtëmujorit të mëparshëm.
Vlerësimet e subjekteve për gjendjen e tregut dhe çmimet në tregun e banesave mbeten përgjithësisht pozitive për afatin e shkurtër dhe më të gjatë. Pritjet e agjentëve të shitjes për të ardhmen paraqiten përsëri pozitive. Agjentët kanë pritje pozitive për ecurinë e tregut në territorin ku ata veprojnë për të ardhmen afatshkurtër dhe për periudhën më të gjatë (deri në dy vjet).
Informacioni mbi ecurinë e çmimeve dhe vlerësimin e situatës nga ana e agjentëve në tregun e pasurive të paluajtshme merret nëpërmjet vrojtimit në terren të një kampioni të përbërë nga 230 subjekte, që kanë si aktivitet kryesor tregtimin e pronave të paluajtshme. Subjektet e zgjedhura janë agjentë të zyrave të tregtimit të pasurive të paluajtshme dhe shoqëri ndërtimi, shitjet e të cilave përfaqësojnë rreth 75%-80% të xhiros së të gjithë popullatës.
Banka e Shqipërisë realizon hartimin e pyetësorit, si edhe hedhjen dhe përpunimin e rezultateve, ndërkohë që Instituti i Statistikave mbulon intervistimin në terren, proceset kryesore të kampionimit dhe kontrollin fizik të pyetësorëve të plotësuar.
“`