Këshilli Bashkiak i Pogradecit miraton rritjen e tarifës së parkimit, opozita shpreh kundërshtimin
Në mbledhjen e fundit të Këshillit Bashkiak të Pogradecit, zhvilluar dy ditë më parë, është vendosur rritja e tarifës së parkimit nga 50 lekë në 100 lekë për disa zona të qytetit. Gjithashtu, është miratuar shtimi i zonave ku parkimi do të jetë me pagesë, nën menaxhimin e shoqërisë “Pogradeci Invest”, e cila administron parkimet publike në qytet.
Projektvendimi u miratua me 18 vota pro nga këshilltarët e mazhorancës, 4 vota kundër dhe 2 abstenime. Gjatë seancës pati debate lidhur me këtë iniciativë të ardhur nga administrata e bashkisë. Disa këshilltarë e kundërshtuan drejtpërdrejt në mbledhje, ndërsa subjekte politike, si Partia e Lirisë, kanë dalë me deklarata publike duke distancuar veten nga ky vendim, të cilin e cilësojnë si një rëndim për xhepat e qytetarëve.
Ky vendim parashikon një rritje prej 50% të tarifave të parkimeve publike në Pogradec. Qytetarët dhe pushuesit, të cilët më parë paguanin 50 lekë për orë parkimi, tashmë do të detyrohen të paguajnë 100 lekë për orë.
Partia e Lirisë, nëpërmjet Sekretarit Politik për Qarkun e Korçës, Gentian Çala, ka lëshuar një deklaratë ku thuhet:
- “Partia e Lirisë, Dega Pogradec, distancohet nga qëndrimi i këshilltarëve të majtë në Këshillin Bashkiak të Pogradecit, të cilët kanë votuar sot për rritjen e çmimeve, më saktë dyfishimin e tyre dhe zgjerimin e vendparkimeve me pagesë në qytet.”
- “Ky qëndrim, kjo vendimmarrje, dëshmon edhe një herë se Bashkia Pogradec nuk ka në fokus interesin e qytetarëve, por u shërben interesave klienteliste të të gjithë atyre që përfitojnë prej tyre.”
- “Situata e rrugëve breাক qytetit, trafiku i rënduar dhe mungesa e parkimeve tregojnë se e gjithë kjo sipërmarrje nuk synon lehtësimin e jetesës së qytetarëve, por thjesht futjen e dorës në xhepat e tyre, me taksa dhe tarifa të fryra, po aq edhe me gjoba.”
- “Përshëndesim qëndrimin e këshilltarëve opozitarë, të cilët, megjithëse nuk kanë votat për të ndalur këtë vendimmarrje, kanë kurajon ta kundërshtojnë atë.”
- “Ndërsa ju, të dashur qytetarë, keni mundësi t’i thoni jo kësaj përmes votës suaj në zgjedhjet e ardhshme vendore!”