Armëpushimi në Gaza: Rubio thekson se Izraeli ka përmbushur detyrën dhe Hamasi duhet të çarmatoset
Sekretari amerikan i Shtetit, Marco Rubio, ka deklaruar se Izraeli nuk do të ketë nevojë për “leje” nga Shtetet e Bashkuara për të rifilluar operacionet ushtarake kundër Hamasit në Gaza, nëse organizata vazhdon të përbëjë një kërcënim. Ai nënvizoi se plani amerikan për armëpushim gëzon mbështetje të gjerë rajonale dhe konsiderohet si “më i miri” dhe “i vetmi plan” aktualisht në diskutim.
Gjatë një konference për shtyp në qendrën e koordinimit të armëpushimit SHBA–Izrael, Rubio u pyet nëse Izraeli mund të veprojë në mënyrë të pavarur për rifillimin e luftimeve, në rast se Hamasi do të riarmatosej ose rigrupohej.
“Nuk mendoj se kjo ka të bëjë me leje apo diçka të ngjashme. Kjo lidhet me angazhimin tonë të përbashkët për ta bërë këtë plan të funksionojë. Nuk ka një plan B. Ky është plani më i mirë, i vetmi plan. Është ai që besojmë se mund të ketë sukses dhe që tashmë është në rrugën drejt suksesit,” tha Rubio.