Kremlini: Rusia në kontakt të vazhdueshëm me Iranin, e gatshme për paqe në rajon
Kremlini njoftoi sot se Rusia po mban kontakte të vazhdueshme me udhëheqjen iraniane dhe është e gatshme të kontribuojë në rivendosjen e paqes dhe stabilitetit në rajon.
Zëdhënësi i Kremlinit, Dmitry Peskov, u shpreh se, “siç ka deklaruar Presidenti Vladimir Putin, Rusia është gjithmonë e gatshme të bëjë gjithçka për të rivendosur paqen dhe stabilitetin në rajon.”
Peskov shtoi se Putin dhe Ministri i Jashtëm Sergei Lavrov kanë komunikuar ditët e fundit me homologët e tyre iranianë, ndërsa Presidenti rus ka zhvilluar gjithashtu një bisedë me Presidentin amerikan Donald Trump.
Lidhur me konfliktin në Ukrainë, Kremlini akuzoi specialistë britanikë për sulmin në qytetin rus Bryansk, ku pretendohet se janë përdorur raketa britanike Storm Shadow. Sipas Moskës, sulmi ka shkaktuar vdekjen e të paktën gjashtë personave dhe ka plagosur 37 të tjerë. Rusia e cilëson këtë si një kërcënim për qytetarët dhe paralajmëron se “operacioni special ushtarak” do të vazhdojë kundër sulmeve të tilla. Ukraina pretendon se goditi një fabrikë që prodhon pjesë për raketa, ndërsa Moska këmbëngul se janë goditur civilë.
Peskov deklaroi gjithashtu se ndërprerjet e internetit dhe masat teknologjike do të vazhdojnë “për aq kohë sa të jetë e nevojshme” për të garantuar sigurinë e qytetarëve dhe se kundërmasat janë të domosdoshme ndaj metodave gjithnjë e më të sofistikuara të sulmeve ukrainase.
Sa i përket dialogut për paqen, Kremlini njoftoi se raundi i ardhshëm i bisedimeve trepalëshe mbi Ukrainën pritet të zhvillohet në Stamboll, megjithëse ende nuk ka detaje konkrete. Rusia dhe Ukraina zhvilluan tre raunde bisedimesh në qytetin turk vitin e kaluar, ndërsa negociatat e ndërmjetësuara nga SHBA-të u mbajtën këtë vit në Abu Dabi dhe Gjenevë.