Rusia shpall ‘Human Rights Watch’ si organizatë të paligjshme
Rusia ka shpallur të paligjshme organizatën Human Rights Watch, duke e klasifikuar atë si një “organizatë të padëshirueshme”. Kjo deklaratë nënkupton që grupi ndërkombëtar për të drejtat e njeriut duhet të ndalojë të gjitha aktivitetet në Rusi, sipas një ligji të miratuar në vitin 2015. Gjithashtu, personat që bashkëpunojnë ose mbështesin këtë grup rrezikojnë të përballen me pasoja ligjore.
Drejtori ekzekutiv i Human Rights Watch, Philippe Bolopion, u shpreh: “Për më shumë se tre dekada, puna e Human Rights Watch mbi Rusinë post-sovjetike ka ushtruar presion mbi qeverinë që të mbështesë të drejtat dhe liritë themelore të njeriut. Puna jonë nuk ka ndryshuar, por ajo që ka ndryshuar në mënyrë dramatike është përqafimi i plotë i politikave autoritare nga qeveria, rritja e dukshme e represionit dhe shkalla e krimeve të luftës që forcat e saj po kryejnë në Ukrainë.”
Ky veprim përbën goditjen më të fundit ndaj kritikëve, aktivistëve dhe gazetarëve të Kremlinit, veprime këto që janë intensifikuar që nga pushtimi i Ukrainës nga Moska në shkurt të vitit 2022.