Reuters: Rusia kërcënon Europën, vendos raketa bërthamore në Bjellorusi
Rusia duket se po vendos gradualisht raketa të reja balistike hipersonike me kapacitet bërthamor në një ish-bazë ajrore në Bjellorusinë lindore. Sipas dy studiuesve amerikanë, të cilët analizuan imazhe satelitore, kjo lëvizje mund të rrisë ndjeshëm aftësinë e saj për të goditur objektiva në të gjithë Evropën.
Vlerësimi i tyre, bazuar në një burim anonim që është në dijeni të çështjes, përputhet gjerësisht me gjetjet e inteligjencës amerikane. Presidenti rus Vladimir Putin ka deklaruar më parë qëllimin e tij për të vendosur raketa “Oreshnik” me rreze të mesme veprimi në Bjellorusi, me një rreze veprimi të vlerësuar deri në 5,500 kilometra, megjithëse vendndodhja e saktë nuk është bërë ende publike.
Ekspertët, të cituar nga Reuters, e shohin vendosjen e mundshme të raketave “Oreshnik” si një shenjë tjetër të mbështetjes në rritje të Kremlinit ndaj kërcënimeve bërthamore. Kjo përpjekje synon të pengojë anëtarët e NATO-s nga mbështetja e mëtejshme e Ukrainës me armë që mund të godasin objektiva thellë brenda territorit rus.
Ambasada ruse në Uashington nuk iu përgjigj një kërkese për koment, ndërsa ambasada bjelloruse nuk pranoi të komentonte. Agjencia shtetërore e lajmeve “Belta” citoi Ministrin bjellorus të Mbrojtjes Viktor Khrenin të thoshte se vendosja e Oreshnik-ëve nuk e ndryshon ekuilibrin e pushtetit në Evropë dhe është një “përgjigje” ndaj “veprimeve agresive” të Perëndimit. Shtëpia e Bardhë dhe CIA refuzuan gjithashtu të komentojnë.