Senatorja amerikane Jeanne Shaheen, anëtare e lartë e Komitetit të Senatit për Marrëdhënie me Jashtë, ka kërkuar rivendosjen e sanksioneve ndaj udhëheqësit të Republika Srpska, Milorad Dodik. Ky reagim vjen pas vendimit të administratës Trump për të hequr sanksionet ndaj tij.
Në një deklaratë, Senatorja Shaheen u shpreh se “Administrata Trump duhet të turpërohet nga vendimi i saj për të hequr udhëheqësin e Republika Srpska Milorad Dodik nga sanksionet e SHBA-së tetorin e kaluar”. Ajo theksoi se “Dodik ka përdorur retorikë separatiste dhe ka minuar integritetin e Marrëveshjes së Paqes së Dejtonit, gjë që bie ndesh me justifikimin e Administratës për të hequr Dodik dhe miqtë e tij nga lista në fund të vitit të kaluar”.
“Vizita e Dodik në Uashington e ka bërë shumë të qartë se ai nuk është i interesuar të vendosë interesat e të gjithë boshnjakëve përpara interesave të tij politike”, vazhdon deklarata e senatores. Ajo shtoi se “Administrata Trump duhet të veprojë shpejt për të rivendosur sanksionet ndaj Dodik sipas sanksioneve të detyrueshme që unë sigurova në Aktin më të fundit të Autorizimit të Mbrojtjes Kombëtare.”