Sot zhvillohet seanca për imunitetin e Belinda Ballukut, ndërsa Partia Demokratike proteston brenda dhe jashtë Kuvendit.
Kuvendi i Shqipërisë do të mblidhet sot në orën 10:00 në seancë plenare për të shqyrtuar kërkesën e Strukturës së Posaçme Kundër Korrupsionit dhe Krimit të Organizuar për heqjen e imunitetit të deputetes Belinda Balluku. Pritet që kjo çështje të shoqërohet me debate dhe tensione politike.
Sipas rendit të ditës, kjo pikë do të jetë e para në axhendë, menjëherë pas nisjes së seancës. Përpara prezantimit të dy raporteve nga përfaqësuesit e opozitës dhe shumicës në Këshillin për Rregulloren, Mandatet dhe Imunitetin, do të ketë një fjalë përshëndetëse nga vetë Balluku. Më pas, opozita dhe shumica parlamentare do të paraqesin qëndrimet e tyre përpara votimit.
Ndërkohë, Partia Demokratike e Shqipërisë ka paralajmëruar protestë para godinës së Kuvendit, në të njëjtën kohë me zhvillimin e seancës. Policia e Tiranës ka marrë masa sigurie, duke rrethuar zonën me gardhe metalike, dhe pritet të ketë kufizime në qarkullimin e automjeteve pranë Parlamentit.