Sekuestrohen 6.8 tonë drogë në Venezuelë, ministri Cabello akuzon mafian shqiptare se operon nga Ekuadori
Një sasi masive prej 6.8 tonë marihuanë dhe kokainë është sekuestruar të martën në Venezuelë, duke çuar në arrestimin e 6 personave të përfshirë në trafikun e lëndëve narkotike.
Ministri i Brendshëm, Diosdado Cabello, ka dhënë detaje duke shpjeguar se dërgesa kryesore përbëhej nga 238 pako, të cilat nga ana tjetër përmbanin gjithsej 14,280 pako më të vogla. Ai ka specifikuar se personat e përfshirë në të dyja rastet kanë lidhje me “mafian shqiptare që vepron nga Ekuadori”, duke shtuar se ai, si ministër, po zhvillon “një luftë të vërtetë kundër trafikut të drogës”.
Cabello ka deklaruar se operacione janë kryer edhe në Zulia, shumica e të cilave lidhen me sekuestrimin e drogës. Procedura e parë që ai ka përmendur është arrestimi i tre personave që posedonin 75 pako marihuanë dhe 39,450 kilogramë të së njëjtës substancë. Operacioni i dytë ka rezultuar në arrestimin e tre personave të tjerë, të cilët mbartnin 50 pako dhe 50 kilogramë marihuanë në shtetin e Zulias.
Cabello ka shpjeguar se, duke bllokuar rrugët detare dhe ajrore, mafiat detyrohen të përdorin rrugë tokësore, ku janë më të ekspozuara ndaj mbikëqyrjes shtetërore.
Si rezultat i operacionit, është sekuestruar një total prej 6,850.41 kilogramë substanca të paligjshme. Dërgesa përbëhej nga 14,199 pako marihuanë (6,758.66 kg) dhe 81 pako kokainë (91.75 kg).
“Kjo është një goditje e madhe ndaj narrativës që thotë se Venezuela lehtëson trafikimin. As kokaina, as marihuana, as ndonjë drogë që shteti mund ta ndalojë gjatë rrugës nuk do të kalojë këtu”, ka deklaruar Cabello, duke theksuar se çdo konfiskim përfaqëson “heqjen e një pengese” nga struktura logjistike kriminale.