Sekuestrohen 3.5 milionë euro pasuri të një personi të dënuar në Itali për trafik droge
Prokuroria e Vlorës njoftoi të mërkurën, më 19 nëntor, sekuestrimin e pasurive me vlerë 3.5 milionë euro, në pronësi të 55-vjeçarit Agron Lamaj, i njohur edhe si Aglon Lamaj, si dhe të subjektit “Rei Royal” sh.p.k..
Më 10 tetor, policia njoftoi se Lamaj u ndalua në Aeroportin e Rinasit teksa tentonte të hynte në Republikën e Shqipërisë. Ai ishte në kërkim nga autoritetet italiane të Firences, pasi ishte dënuar me 7 vjet burgim për trafikim të lëndëve narkotike.
Sipas prokurorisë, hetimi për pastrimin e produkteve penale ka filluar në vitin 2022. Nga ky hetim rezultoi se burimi i ligjshëm i pasurive të shumta të paluajtshme nuk ishte provuar.
Me kërkesë të Prokurorisë Vlorë, gjykata ka vendosur masën e sigurimit pasuror “Sekuestro preventive” ndaj:
- 12 njësive me sipërfaqe të përgjithshme rreth 768 m²;
- dy apartamenteve me sipërfaqe 270 m²;
- dy pasurive të llojit “pemëtore” me sipërfaqe totale 1600 m²;
- truallit me sipërfaqe 249.5 m²;
- një garazhi me sipërfaqe 202 m².
Në njoftimin e policisë së një muaji më parë, bëhej me dije se Lamaj ishte dënuar nga Gjykata e Apelit të Firences në vitin 2024 për trafikim të lëndëve narkotike. Ai akuzohej se në vitin 2007, në bashkëpunim me shtetas të tjerë, kishte transportuar drogë nga Holanda në Itali.