Senati miraton përfundimisht propozimin për t’i dhënë fund përkohësisht mbylljes së qeverisë
Senati Amerikan miratoi të hënën një tekst për të zgjatur ekzekutimin e buxhetit (rezolutë e vazhdueshme, CR) për t’i dhënë fund paralizës fiskale në SHBA. Kjo arritje u bë e mundur falë mbështetjes së një grupi senatorësh demokratë, duke e dërguar projektligjin tani në Dhomën e Përfaqësuesve, e cila do të thirret për të votuar brenda javës.
Projektligji u miratua me 60 vota pro dhe 40 kundër. Ky votim, i dyti radhazi, erdhi pas një kompromisi mes Partisë Republikane të Presidentit Donald Trump dhe disa senatorëve të opozitës. Megjithatë, ky kompromis ka shkaktuar zemërim tek shumë demokratë.
Njoftimi i miratimit u bë në një sallë pothuajse të zbrazët, me senatorët që qëndruan deri në fund dhe duartrokitën vendimin.
“Ne do ta rihapim qeverinë, do të sigurohemi që punonjësit federalë të marrin kompensimin që kanë fituar dhe meritojnë”, tha senatorja republikane Susan Collins, e cila luajti një rol kyç në hartimin e projektligjit.
Që nga tetori, shumë agjenci qeveritare kanë pezulluar operacionet, me rreth 1.4 milion punonjës federalë në pushim të detyruar ose duke punuar pa pagesë. Mbyllja ka prekur funksione kritike si transporti ajror dhe kuponat ushqimore për 41 milion qytetarë me të ardhura të ulëta.