### Kryediplomatët e Danimarkës dhe Groenlandës takohen me zyrtarë të SHBA-së
Ministrat e jashtëm të Danimarkës dhe Groenlandës do të takohen sot në Shtëpinë e Bardhë me zëvendëspresidentin e SHBA-së, JD Vance, dhe Sekretarin e Shtetit, Marco Rubio. Ky takim zhvillohet ndërsa Presidenti Donald Trump ka përsëritur kërkesën që Uashingtoni të marrë kontrollin e Groenlandës, një territor autonom i Danimarkës.
Trump argumenton se ishulli, i vendosur në një pozicion strategjik dhe i pasur me minerale, është jetik për sigurinë e SHBA-së dhe Shtetet e Bashkuara duhet ta zotërojnë atë për të parandaluar ndonjë pushtim nga Rusia ose Kina. Ai ka deklaruar se të gjitha opsionet janë në tryezë për të siguruar territorin.
“Është jetike për Kupolën e Artë që po ndërtojmë,” ka thënë ai në një postim në rrjetet sociale, duke iu referuar një sistemi të propozuar të mbrojtjes raketore, vetëm pak orë para fillimit të takimit.
Trump ka shtuar gjithashtu se NATO do të bëhej shumë më e fuqishme dhe efektive nëse Groenlanda do të ishte në duart e SHBA-së. “Çdo gjë më pak se kjo është e papranueshme,” ka shkruar ai.
Në një postim pasues, duke përmendur Rusinë dhe Kinën, Trump ka shkruar: “NATO: Thuaji Danimarkës t’i nxjerrë që këtej, TANI! Dy slita qensh nuk do ta bëjnë! Vetëm SHBA-të munden!!!”
Groenlanda dhe Danimarka kanë pohuar se ishulli nuk është në shitje, se kërcënimet me forcë janë të pamatura dhe se shqetësimet e sigurisë duhet të zgjidhen midis aleatëve. Disa vende të BE-së kanë shprehur mbështetje për Danimarkën.
Përpara takimit, Groenlanda dhe Danimarka kanë njoftuar se kanë filluar të shtojnë praninë e tyre ushtarake në dhe përreth Groenlandës, në bashkëpunim të ngushtë me aleatët e NATO-s, si pjesë e angazhimit të tyre për të forcuar mbrojtjen e Arktikut. Sipas ministrisë daneze të mbrojtjes, prania e shtuar ushtarake do të përfshijë një sërë aktivitetesh stërvitore gjatë gjithë vitit 2026.