Uashingtoni godet ndikimin kinez në Greqi: “Porti i Pireut, problem strategjik”
Administrata Trump ka shënjestruar një objektiv të ri europian: pronësinë shtetërore kineze të portit të Pireut në Greqi. Ambasadorja amerikane në Greqi, Kimberly Guilfoyle, në një intervistë për median lokale Antenna TV, u shpreh: “Është fatkeqësi, por mendoj se ka mënyra për ta anashkaluar, diçka që mund të arrihet, qoftë duke ndjekur një rrugë për të rritur prodhimin në zona të tjera, ose ndoshta që Pireu të mund të nxirret në shitje.”
Kina investoi rëndë në Greqinë e zhytur në borxhe gjatë krizës së saj të gjatë ekonomike, me synimin për ta kthyer vendin në një nyje për eksportet kineze. Athina i kërkoi me këmbëngulje investimet e Pekinit, teksa kompani nga vende të tjera perëndimore u larguan nga Greqia, të trembura nga problemet e saj financiare dhe burokracia famëkeqe.
Cosco, kompania shtetërore kineze e transportit detar, siguroi një pjesë kontrolluese të portit më të madh grek, Pireut, në vitin 2016, duke e kthyer atë në pjesë kyçe, të ashtuquajturën “koka e dragoit”, të projektit të madh global kinez të infrastrukturës, të njohur si Nisma Brez dhe Rrugë (Belt and Road Initiative).
Guilfoyle, ish-prezantuese televizive në televizionin amerikan Fox, sugjeroi se ndikimi aktual i Pekinit mund të balancohej potencialisht nga rritja e investimeve amerikane në projekte të tjera infrastrukturore. Ajo shtoi: “Mendoj se është shumë e rëndësishme të ketë infrastrukturë amerikane këtu për të ndihmuar në mbështetjen e rajonit. Që ndoshta, në fakt, të rritet prodhimi nga porta dhe zona të tjera për të balancuar ndikimin kinez në portin e Pireut.”
Greqia e shiti portin e Pireut nën presionin e kreditorëve evropianë, dhe Cosco ishte e vetmja kompani që paraqiti ofertë. Guilfoyle shtoi se Uashingtoni e sheh Greqinë si një nyje energjetike në rritje, thelbësore për sigurimin e pavarësisë energjetike “për t’u kundërvënë interesave ruse dhe kineze.”