Shqiptarët po shtojnë blerjet e automjeteve, duke u shtuar çdo ditë rreth 235 mjete të reja rrjetit rrugor të vendit.
Periudha janar-shtator ka regjistruar mbi 74 mijë mjete të reja, duke kontribuar në rritjen e automotorizimit në Shqipëri. Një analizë e të dhënave tregon se 82% e mjeteve të regjistruara për herë të parë janë autovetura.
Krahasuar me vitin 2019, numri i automjeteve është rritur me 101% deri në vitin 2025. Flota automjetore në Shqipëri dominohet nga importet nga Koreja e Jugut, Italia, Gjermania, Zvicra, Kina dhe SHBA.
Aktualisht, mbi 1 milion automjete janë në qarkullim në Shqipëri, duke nënkuptuar se rreth gjysma e popullsisë posedon një automjet. Megjithëse infrastruktura rrugore mbetet e pandryshuar, numri i makinave, kryesisht ato personale, vazhdon të rritet, ndërsa ato për transport publik janë më pak.
Afro 35% e të gjitha automjeteve në qarkullim janë të përqendruara në qarkun e Tiranës.