Pesë të vdekur dhe gjashtë të plagosur në një shkëmbim zjarri në kufirin afgano-pakistanez
Pesë persona humbën jetën dhe gjashtë të tjerë u plagosën në një shkëmbim të shkurtër zjarri ndërkufitar midis Afganistanit dhe Pakistanit të enjten. Një zyrtar spitalor nga ana afgane informoi agjencinë AFP për incidentin, për të cilin të dy vendet fajësuan njëri-tjetrin.
Ky incident me gjasë do të ndërlikojë negociatat e armëpushimit që po zhvillohen aktualisht në Turqi, negociata këto që synojnë finalizimin e një marrëveshjeje për t’i dhënë fund përleshjeve vdekjeprurëse mes fqinjëve të Azisë Jugore. Çështjet e sigurisë janë në qendër të mosmarrëveshjeve të tyre, ku Pakistani akuzon Kabulin për strehimin e grupeve militante, veçanërisht talebanëve pakistanezë (TTP), të cilët ndërmarrin sulme në Pakistan. Qeveria talebane mohon këto akuza.
Sipas zyrtarit anonim në spitalin e distriktit Spin Boldak, në provincën jugore të Kandaharit, Afganistan, “pesë persona vdiqën në incidentin e sotëm – katër gra dhe një burrë – dhe gjashtë u plagosën.” Nuk pati raporte të menjëhershme për viktima nga pala pakistaneze.
Të dy vendet fajësuan shpejt njëri-tjetrin për fillimin e zjarrit. “Ndërsa raundi i tretë i negociatave me palën pakistaneze ka filluar në Stamboll, për fat të keq, këtë pasdite forcat pakistaneze hapën përsëri zjarr ndaj Spin Boldak,” tha zëdhënësi i qeverisë talebane, Zabihullah Mujahid. “Forcat e Emiratit Islamik, nga respekti për ekipin negociator dhe për të parandaluar viktimat civile, deri më tani nuk kanë treguar asnjë reagim,” shtoi zyrtari në platformën X.
Pakistani e mohoi akuzën dhe ia hodhi fajin Afganistanit. “Ne i hedhim poshtë fuqimisht pretendimet e qarkulluara nga pala afgane,” tha Ministria e Informacionit e Pakistanit në X. “Të shtënat u nisën nga pala afgane, ndaj të cilave forcat tona të sigurisë iu përgjigjën menjëherë në një mënyrë të matur dhe të përgjegjshme.”
Hamdullah Fitrat, zëvendëszëdhënës i autoriteteve talebane, tha se “nuk e dimë arsyen” e zjarrit pakistanez, duke shtuar për AFP-në se bisedimet në Turqi ishin duke vazhduar. “Pakistani përdori armë të lehta dhe të rënda dhe shënjestroi zona civile,” tha një burim ushtarak afgan, i cili foli në kushte anonimiteti.
Ali Mohammed Haqmal, kreu i departamentit të informacionit të Kandaharit, tha se të shtënat ishin të shkurtra. Banorët i thanë AFP-së se incidenti zgjati 10-15 minuta.
Pakistani konfirmoi se qetësia ishte rivendosur. “Situata u vu nën kontroll falë veprimeve të përgjegjshme nga forcat pakistaneze dhe armëpushimi mbetet i paprekur,” tha ministria e informacionit. “Pakistani mbetet i përkushtuar ndaj dialogut të vazhdueshëm dhe pret reciprocitet nga autoritetet afgane.”
Negociatat në Stamboll arritën në një bllokim javën e kaluar kur erdhi puna për finalizimin e detajeve të armëpushimit, me secilën palë që akuzoi tjetrën se nuk ishte e gatshme të bashkëpunonte. Të dyja palët paralajmëruan gjithashtu për një rifillim të armiqësive në rast të dështimit.
Mikpritësi, Turqia, tha në përfundim të bisedimeve të javës së kaluar se palët kishin rënë dakord të krijonin një mekanizëm monitorimi dhe verifikimi për të ruajtur paqen dhe për të penalizuar shkelësit.
Pesëdhjetë civilë u vranë dhe 447 të tjerë u plagosën në anën afgane të kufirit gjatë një jave përleshjesh në tetor, sipas Kombeve të Bashkuara. Të paktën pesë persona vdiqën në shpërthime në Kabul.
Ushtria pakistaneze raportoi se 23 ushtarë të saj u vranë dhe 29 të tjerë u plagosën, pa përmendur viktima civile.
Qeveria talebane dëshiron që të respektohet sovraniteti territorial i Afganistanit. Islamabadi gjithashtu akuzon qeverinë afgane se vepron me mbështetjen e Indisë, armikut të saj historik, mes lidhjeve më të ngushta midis këtyre dy vendeve.