Të huajt shpenzuan 4.4 miliardë euro në Shqipëri, shqiptarët jashtë vendit 2.1 miliardë euro
Si shpenzimet e të huajve që vizitojnë Shqipërinë, ashtu edhe ato të shqiptarëve jashtë vendit janë rritur ndjeshëm gjatë nëntë muajve të parë të këtij viti. Sipas Bankës së Shqipërisë, gjatë periudhës janar-shtator, shpenzimet e të huajve në Shqipëri arritën një rekord prej 4.4 miliardë eurosh, duke shënuar një rritje prej 14.5% krahasuar me të njëjtën periudhë të vitit të kaluar.
Niveli më i lartë i shpenzimeve u regjistrua në tremujorin e tretë të vitit, kohë kjo që përkon me kulmin e sezonit turistik. Për muajt e verës, të huajt që vizituan Shqipërinë për turizëm ose për arsye të tjera shpenzuan një rekord prej 2.3 miliardë eurosh, duke u rritur me 21.6% krahasuar me të njëjtën periudhë të vitit të kaluar.
Megjithatë, këto shifra të rritjes së ndjeshme, të publikuara nga Banka e Shqipërisë, duket se nuk përputhen me deklarimet e operatorëve turistikë. Ata shprehen se turistët që vizitojnë Shqipërinë po shpenzojnë gjithnjë e më pak. Gjithashtu, edhe kompanitë e mëdha shpërndarëse dhe prodhuese raportuan se u mbeti mall i pashitur për shkak të prodhimit të lartë në pritje të një konsumi të fuqishëm nga turizmi, por u zhgënjyen.
Të dhënat e INSTAT konfirmojnë hyrjen në vend të 10.2 milionë shtetasve të huaj gjatë periudhës janar-shtator, me një rritje prej 5.7%. Për periudhën korrik-shtator, hynë 5.4 milionë shtetas të huaj, që përfaqëson një rritje prej 6.2% krahasuar me të njëjtën periudhë të vitit të kaluar.
Sipas të dhënave të kombinuara, shpenzimi mesatar për turist është rritur në 431 euro për nëntë muajt e parë, nga 398 euro në janar-shtator 2024. Edhe shqiptarët jashtë vendit kanë shpenzuar më shumë.
Edhe shqiptarët nuk kursejnë jashtë vendit, bilanci përmirësohet
Shpenzimet e shqiptarëve jashtë vendit kanë arritur gjithashtu një nivel rekord prej 2.1 miliardë eurosh, me një rritje prej gati 20% krahasuar me janar-shtator 2024. Rritja e fortë e të ardhurave nga të huajt ka sjellë një përmirësim të bilancit të udhëtimeve, i cili mat diferencën mes shpenzimeve të të huajve në Shqipëri dhe atyre të shqiptarëve jashtë vendit. Për nëntë muajt e parë, ky bilanc arriti në 2.1 miliardë euro, duke përfaqësuar shumën neto që i mbetet vendit.
Burimi: INSTAT