Për herë të parë në Shqipëri, numri i makinave i kalon 1 milion më 2025
Në fund të vitit 2025, Shqipëria ka shënuar një rekord historik me mbi 1 milion mjete rrugore në qarkullim. Nga totali, 847 mijë ishin autovetura.
Të dhënat e INSTAT për tremujorin e katërt të vitit 2025 tregojnë se numri i përgjithshëm i mjeteve rrugore në territorin shqiptar arriti në 1.048.092. Autoveturat përbëjnë shumicën dërrmuese, me 80,8% të totalit, të ndjekura nga motorët (6,1%) dhe automjetet për transport të përzier (5,8%).
Qarku i Tiranës kryeson për nga numri i mjeteve, duke zënë 34,7% të totalit, pasuar nga Durrësi me 13,6%. Ndërkohë, Gjirokastra dhe Kukësi kanë numrin më të ulët të mjeteve, përkatësisht 2,1% dhe 2,4%.
Gjatë këtij tremujori, janë regjistruar për herë të parë 24.854 mjete, ku 81,2% ishin autovetura. Tirana vazhdon të jetë lider edhe në regjistrimet e reja, me 40,3% të tyre.
Krahasuar me të njëjtin tremujor të vitit 2024, vihen re këto ndryshime:
- Numri total i mjeteve është rritur me 9,3%.
- Regjistrimet e reja kanë shënuar një rritje prej 8,5%.
Sipas INSTAT, në mesin e mjeteve të regjistruara për herë të parë, Volkswagen zë vendin e parë me 18,6%, ndjekur nga Mercedes Benz me 17,5%.
Numri i automjeteve për 1.000 banorë në Shqipëri ka arritur në 358, një rritje e ndjeshme nga më pak se 200 që ishte disa vite më parë. Megjithatë, ky nivel mbetet nën mesataren europiane prej 550 autoveturave për 1.000 banorë (sipas Eurostat) dhe konsiderohet ndër më të ulëtat në Europë, duke u renditur para vetëm Turqisë dhe Maqedonisë së Veriut.