“`html
Shqipëria në “Bordin e Paqes”: Votimi në Kuvend me procedurë të përshpejtuar, PD shprehet pro
Nisma për pjesëmarrjen e Shqipërisë në “Bordin e Paqes” do të shqyrtohet me procedurë të përshpejtuar në Kuvend. Kryetari i Grupit Parlamentar të PS, Taulant Balla, u ka dërguar një mesazh deputetëve të grupit, duke i informuar për nevojën e gatishmërisë për një seancë të mundshme plenare para datës 27 janar, datës së seancës së radhës parlamentare.
“Përshëndetje kolege dhe kolegë,” thuhet në mesazh. “Aderimi i Shqipërisë në Bordin e Paqes, pas miratimit nga Qeveria, do të kërkojë edhe ratifikimin/votimin në Kuvend. Prandaj ky proces do të kryhet me procedurë të përshpejtuar në respekt të Kushtetutës dhe Rregullores së Kuvendit sapo të vijë nga Këshilli i Ministrave. Ndoshta do kemi nevojë për një seancë në ditët në vijim. Ju lutem merrni masa paraprakisht për prezencën.”
Kryeministri Edi Rama, përmes një postimi në platformën “X”, njoftoi se ftesa e presidentit Donald Trump për pjesëmarrje në “Bordin e Paqes” për Gazën, do t’i përcillet Kuvendit të Shqipërisë për miratim. Ai falenderoi Trump për ftesën dhe e cilësoi iniciativën e presidentit amerikan si një model transformues të ndërtimit të paqes në nivel global.
Nga ana e saj, deputetja e Partisë Demokratike, Ina Zhupa, në një lidhje direkte për A2CNN, deklaroi se opozita do ta votojë pa hezitim iniciativën e Donald Trump për pjesëmarrjen e Shqipërisë në Bordin e Paqes.
“PD-ja ka qenë, është dhe do të jetë një parti proamerikane dhe proeuropiane dhe i shikon Shtetet e Bashkuara të Amerikës si partner strategjik,” u shpreh Zhupa. “Fakti që Presidenti amerikan po ndërton një bord me të gjitha shtetet, ku Shqipëria nuk mund të bënte përjashtim, pasi aty gjen edhe vende si Rusia, Bjellorusia etj., nuk është privilegj për Ramën, por thjesht një pjesëmarrje si shtet në një bord me mbi 100 vende.”
Ajo shtoi se për Partinë Demokratike, jo vetëm që janë një parti proamerikane, por kanë mbajtur edhe qëndrim publik në mbështetje të Presidentit Donald Trump. “Mbështesim çdo iniciativë të paqes dhe të Trumpit dhe nuk do jemi kurrë kundër vendimeve të marra nga administrata amerikane,” theksoi Zhupa.
“Kjo nuk është as çështje për diskutim në PD. Është në statutin tonë dhe në idealin tonë. Tentativa e Edi Ramës për ta shitur ftesën si një miqësi personale, si sukses apo lider i përzgjedhur, ishte propagandë sepse nuk ka lidhje me ndonjë arritje të mazhorancës. Është diçka protokollare dhe PD-ja nuk i ngatërron qëndrimet e saj ndaj mazhorancës me raportin që ka me SHBA-në,” përfundoi Zhupa.
“`