Kombëtarja shqiptare do të ndeshet me Ukrainën në një ndeshje miqësore që do të zhvillohet në Valencia më 31 mars.
Dy lojtarë, Ylber Ramadani dhe Arlind Ajeti, kanë lënë grumbullimin. Ramadani është kthyer për arsye familjare pasi pret të bëhet baba, ndërsa Ajeti është dëmtuar dhe duhet të kthehet te klubi i tij në Turqi.
Nëse nuk do të ketë largime apo dëmtime të tjera, trajneri Silvinjo do të përballet sërish me detyrën për të lënë një lojtar jashtë listës për ndeshjen. Aktualisht, 24 futbollistë janë në dispozicion, ndërsa vetëm 23 do të lejohen të marrin pjesë në ndeshje.
Kujtojmë se ndeshjen kundër Polonisë nuk e kanë mundur të luajnë Jasir Asani, Nazmi Gripshi dhe Klisman Çake. Është e sigurt që të paktën dy lojtarë që nuk ishin në dispozicion kundër Polonisë, do të jenë pjesë e ekipit për sfidën me Ukrainën.