BILD: Sipërmarrësit gjermanë kërkojnë tregje të reja. Një vizitë te njeriu më i pasur i Azisë
Sipërmarrjet e vogla dhe të mesme gjermane po bëhen gjithnjë e më të pranishme në arenën ndërkombëtare. Kjo për shkak të humbjes së besimit ndaj qeverisë federale, e cila i ka shtyrë ato të kërkojnë vetë mundësi jashtë vendit.
Sarna Röser, një sipërmarrëse dhe një nga zërat më të fuqishëm të sektorit të Ndërmarrjeve të Vogla dhe të Mesme (NVM), ka nisur një iniciativë që po sjell kompanitë e mesme gjermane në “tryezën botërore”. Röser ka kritikuar fort qasjen e politikës gjermane ndaj biznesit të mesëm:
“Për vite me radhë, ndërmarrjet e vogla dhe të mesme i kanë parë drejtuesit e qeverisë gjermane si drejtuesit e vjetër të DAX-it, duke menduar se ata përfaqësojnë të gjithë ekonominë gjermane. Por njerëzit që kanë vërtet ndikim janë në bizneset e tyre! Në një moment vendosa: mjaft më. Po i sjellim vetë NVM-të gjermane në tryezën botërore – të vendosura, të pavarura dhe në kushte të barabarta.”
Takim i pazakontë me njeriun më të pasur të Azisë
Gjatë një vizite të fundit në Indi, një delegacion i përbërë nga pronarë dhe drejtues të bizneseve nga sektorë të ndryshëm si ai automobilistik, tekstili, farmaceutik, ndërtim, logjistikë dhe energji, u prit nga Mukesh Ambani (68 vjeç), kreu i Reliance Industries dhe njeriu më i pasur i Azisë.
Në takimin me Mukesh Ambani morën pjesë:
- Christian van Daniels, pronar i Van Laack
- Michael Schröder
- Sarna Röser, sipërmarrëse dhe anëtare e bordit mbikëqyrës (përfshirë Fielmann, FlatexDEGIRO)
- Viktoria Vollmann, Vollmann Group
- Claudia Rutt, bashkëthemeluese e DKMS
- Dorian Ducka, ish-zëvendësministër i Energjisë dhe Industrisë së Shqipërisë
Forbes vlerëson pasurinë e Ambani-t në rreth 94.8 miliardë euro. Pritja në një nivel kaq të lartë është e rrallë për biznesmenë të mesëm, pasi Ambani zakonisht i rezervon takime të tilla krerëve të shteteve.
Sipas Röser, ky interes i jashtëzakonshëm tregon se bota është e gatshme të bashkëpunojë drejtpërdrejt me “shtyllën kurrizore të ekonomisë gjermane”.
“Nuk kemi pse të presim që Berlini të na marrë me vete. Bota ka kohë që po shtron tapetin e kuq për ne; dëshiron të flasë me ne, me ata që po bëjnë vërtet ndryshimin,” tha Röser.
Një qasje e re: veprim, jo pritje
Sipërmarrësja theksoi se delegacionet e saj nuk janë “ture turistike”, por misione konkrete ekonomike:
“Ne krijojmë akses, ndërtojmë aleanca dhe tregojmë se NVM-të mund të kenë ndikim global.”
Deri më tani, Röser ka bashkë-organizuar nëntë udhëtime biznesi në vende si Arabia Saudite, Vietnami dhe India, duke synuar hapjen e tregjeve të reja dhe krijimin e lidhjeve të drejtpërdrejta ekonomike. Ajo vlerëson energjinë e ekonomive të reja.
“Këto vende janë të entuziazmuara për të ardhmen! Ato mendojnë në shkallë të gjerë, veprojnë shpejt, besojnë në progres. Pikërisht këtë ka harruar Gjermania,” tha Röser.
Udhëtimet e ardhshme: India, Meksika dhe Arabia Saudite
Agjenda ndërkombëtare e NVM-ve të udhëhequra nga Röser është tashmë e planifikuar. Në pranverë, delegacioni do të rikthehet në Indi për të marrë pjesë në Raisina Dialogue, konferencën më të madhe të sigurisë në Azi, ku Röser synon të zhvillojë takime me liderë politikë dhe ekonomikë.
Meksika dhe Arabia Saudite gjithashtu janë në itinerar, me qëllim zgjerimin e bashkëpunimit dhe gjetjen e partnerëve të rinj për industrinë gjermane të mesme.
Në përfundim të deklaratës së saj për BILD, Röser nënvizoi misionin e saj: “E ardhmja u përket atyre që e formësojnë atë”.