Skandali me Biopsitë në QSUT: Të akuzuar për indiferencë ndaj pacientëve me kancer
Gazetari Osman Stafa ka publikuar një letër shqetësimi drejtuar ish-Drejtorit të QSUT-së, Enkel Joti, dhe ish-Ministres së Shëndetësisë, Ogerta Manastirliu. Letra, e dërguar nga mjekë dhe specializantë të Shërbimit të Anatomi Patologjisë në QSUT, ngre shqetësime serioze lidhur me vonesat në përpunimin e biopsive për pacientët e dyshuar me kancer.
Sipas gazetarit Stafa, letra thekson se “biopsitë që vijnë në laborator futen 4 javë me vonesë në proces”, duke e cilësuar këtë si “dëshmia më e frikshme”. Vonesat dyshohet se ishin urdhëruar nga Shefja e Anatomi Patologjisë, Majlinda Ikonomi.
Gazetari Stafa, i cili ka raportuar vazhdimisht për skandale në Onkologjik, ka theksuar se nëse këto pretendime janë të vërteta, kemi të bëjmë me “veprime ç’njerëzore”. Vonesa prej një muaji, siç pretendohet, e kërkuar nga titullarja, e kombinuar me vonesa të tjera në procesin e punës prej rreth dy javësh, çon totalin e vonesës së një biopsie në një muaj e gjysmë.
Stafa ngre pyetje kritike drejtuar institucioneve:
- A është e vërtetë kjo situatë?
- A ka kryer QSUT ndonjë hetim për këtë çështje?
- A ka kryer Ministria e Shëndetësisë, nën drejtimin e Ogerta Manastirliut, ndonjë hetim të brendshëm për të zbardhur të vërtetën?
- A ka kryer ish-ministrja Albana Koçiu ndonjë hetim?
- A do të kryejë ministrja aktuale, Evis Sala, ndonjë hetim?
Po ashtu, gazetari shtron dyshimin nëse 10 mjekët dhe specializantët që kanë firmosur ankesën po gënjejnë apo po thonë të vërtetën. Ai thekson se, nëse pretendimi i tyre është i vërtetë, pacientët përballen me humbje kohe të çmuar në betejën kundër sëmundjes.
Gazetari përfundon duke vënë në dukje se personat që kanë firmosur ankesën mbajnë përgjegjësi për deklarimet e tyre dhe në një “vend normal” ata duhet të thirreshin nga Prokuroria për të dhënë dëshmitë. Sipas tij, kjo situatë tejkalon neglizhencën.