Skiatori Britanik Kërcënohet me Vdekje Pas Mesazhit kundër ICE
Skiatori britanik Gus Kenworthy ka denoncuar kërcënime për vdekje, përfshirë mesazhe që i urojnë atij të “rrëzohet” gjatë garës, pas reagimit të tij kritik ndaj veprimeve të agjentëve të Imigracionit dhe Kontrollit të Doganave të SHBA (ICE).
Kenworthy, i cili shfaqi indinjatën e tij ndaj këtyre veprimeve, thotë se disa persona kanë dëshiruar që ai të “thyejë qafën” gjatë garës.
Skiatori i stilit të lirë, i lindur në Chelmsford (Angli) por i rritur në Kolorado që nga mosha dy vjeç, dhe që garoi me ekipin e SHBA në Lojërat Olimpike të 2014-ës, kishte postuar një foto në rrjetet sociale ku shfaqej një mesazh mbi dëborë, i shkruar me urinë, ku lexohej: “Fuck ICE”.
Pas këtij veprimi, ai thotë se, megjithëse ka marrë edhe mesazhe mbështetëse, disa kërcënime kanë qenë të tmerrshme. “Njerëzit më thonë të vetëvritem, më kërcënojnë, duan të më shohin duke u goditur në gjunjë ose duke më thyer qafën gjatë garës, më fyejnë… Është çmenduri”, u shpreh ai.
Kenworthy lavdëroi yjet amerikane Hunter Hess dhe Michaela Schifrin për qëndrimin e tyre kritik ndaj administratës Trump. “Është frymëzues dhe e rëndësishme”, tha ai.
“Mendoj se herë pas here njerëzit harrojnë që mund të duash SHBA-në dhe të jesh krenar për të qenë amerikan (unë jam), dhe megjithatë të mendosh se mund të bëhet më mirë, dhe se të duash SHBA-në nuk do të thotë se mbështet këtë administratë”, përfundoi skiatori.