Sllovenia po shqyrton ndalimin e rrjeteve sociale për fëmijët nën 15 vjeç
Sllovenia po përgatit një projektligj që synon të ndalojë aksesin e fëmijëve nën moshën 15 vjeç në mediat sociale. Zëvendëskryeministri slloven, Matej Arkon, bëri të ditur këtë lajm gjatë një konference për shtyp të mbajtur të martën.
Sllovenia, me një popullsi prej rreth 2 milionë banorësh, po i bashkohet kështu linjës së Spanjës dhe vendeve të tjera që kanë propozuar kufizime për përdorimin e mediave sociale nga adoleshentët. Ky veprim pasqyron një tendencë në rritje në Evropë për të adresuar shqetësimet rreth teknologjisë, e cila sipas disa vlerësimeve, është dizenjuar të krijojë varësi.
Arkon theksoi se Ministria e Arsimit ka marrë iniciativën, duke u bazuar në përvojat e vendeve të tjera. Për hartimin e projektligjit, i cili ka si synim kryesor mbrojtjen e fëmijëve dhe adoleshentëve, do të përfshihen edhe ekspertë në fushën e arsimit dhe teknologjisë dixhitale.
“Kjo temë ka qenë shumë ‘e nxehtë’ në nivel global dhe evropian javët dhe muajt e fundit. Me këtë nismë, ne si qeveri tregojmë se kujdesemi për fëmijët tanë”, deklaroi Arkon pas një mbledhjeje të kabinetit. Ai shtoi se qeveria dëshiron të rregullojë platformat e mediave sociale ku shpërndahet përmbajtje, duke përmendur shembuj si TikTok, Snapchat dhe Instagram.
Në Spanjë, propozimi është që të ndalohet përdorimi i mediave sociale nga adoleshentët nën moshën 16 vjeç. Edhe vende të tjera, si Britania dhe Franca, po shqyrtojnë masa më të rrepta për mediat sociale. Australia, në dhjetor, u bë vendi i parë që ndaloi aksesin në platforma të tilla për fëmijët nën moshën 16 vjeç.