Kreu i SPAK, Altin Dumani, ka raportuar sot në Komisionin e Ligjeve në Kuvend, duke iu përgjigjur pyetjeve të deputetëve lidhur me ecurinë e hetimeve për raste të rëndësishme.
Deputeti demokrat Oerd Bylykbashi ka ngritur shqetësime rreth hetimeve për Portin e Durrësit dhe Eco Parkun në Durrës. Ai ka pyetur nëse janë filluar hetimet për kallëzimet penale të bëra nga PD, duke theksuar se Porti i Durrësit është një aset strategjik me rëndësi ushtarake dhe se procesi aktual mund të çojë në marrjen e pasurive publike.
Lidhur me Eco Parkun, Bylykbashi ka shprehur shqetësim për diferencën mes vlerës së kontratës (19 mln euro) dhe shumës së shpenzuar për punimet (12.5 mln euro), duke pyetur nëse ka nisur hetim, pasi çështja përfshin edhe kryeministrin.
Në përgjigje, kreu i SPAK, Altin Dumani, ka konfirmuar se për Portin e Durrësit është filluar procedim penal dhe aktualisht ndodhet në fazën e hetimit paraprak, duke shtuar se nuk do të japë informacione shtesë, por deputeti mund të bëjë një shkresë zyrtare.
Sa i përket Eco Parkut, Dumani ka bërë të ditur se edhe për këtë rast është filluar procedim penal në fazën e hetimit paraprak. Ai ka informuar se, bazuar në të dhënat e tij, hetimet janë drejt përfundimit dhe procedimi penal është filluar para kallëzimit të bërë nga ana e PD.