“`html
SPAK kërkon arrestimin e Belinda Ballukut për manipulim tendersh dhe presion ndaj dëshmitarëve
Prokuroria e Posaçme kundër Korrupsionit dhe Krimit të Organizuar (SPAK) ka kërkuar arrestimin e ish-zv.kryeministres Belinda Balluku. Argumentet kryesore të SPAK-ut për këtë kërkesë, përveç dyshimeve për manipulim të nëntë tenderave, janë të dhënat nga përgjimet që tregojnë ushtrimin e presionit dhe joshjes me korrupsion ndaj dëshmitarëve. Këto veprime krijojnë një rrezik real për prishjen e provave dhe ndikimin në procesin hetimor.
Deputetët e opozitës, gjatë mbledhjes së Këshillit për Rregulloren, Mandatet dhe Imunitetin të datës 23 shkurt 2026, kanë zbuluar qëndrimet e prokurorëve të SPAK-ut lidhur me kërkesën për arrestimin e Belinda Ballukut. Citimet e prokurorëve Klodian Braho, Dritan Prençi dhe Dorina Bejko, të nxjerra nga raporti përfundimtar i opozitës, mbështesin kërkesën e SPAK-ut.
Prokurorët theksojnë se, përveç dyshimeve për manipulimin e tendersave, shqetësimi kryesor është rreziku për procesin gjyqësor, ndikimi mbi dëshmitarët dhe prishja e provave. Ky element, sipas materialeve në raportin parlamentar, ka shtyrë organin e akuzës të kërkojë zëvendësimin e masave të sigurisë me arrest. Kjo kërkesë mbështetet në të dhëna konkrete për intimidim dhe joshje të personave që po merren në pyetje, të cilat janë shfaqur pas vendimit të gjykatës.
Në qendër të këtyre pretendimeve qëndrojnë përgjimet e autorizuara nga gjykata dhe transkriptimet e një bisede telefonike të datës 20 nëntor 2025, një ditë pas vendimit të gjykatës të datës 19 nëntor 2025. Prokuroria pretendon se ky material provues tregon qartë se dëshmitarët po përballen me presion, frikë, tentativa korrupsioni, dhe madje edhe orientim për të ndryshuar avokatin.
Volumi i çështjes dhe pesha e saj sipas prokurorit Braho
Prokurori Klodian Braho përshkroi dosjen si shumë voluminoze. Ai deklaroi para deputetëve në Këshillin e Mandateve se, nëse do të shtypeshin të gjitha materialet, ato mund të arrinin në dy apo tre furgonë me letra. Lidhur me peshën e çështjes, Braho theksoi se ajo lidhet me numrin e fakteve penale, numrin e procedurave të dyshuara për kundërshtim me ligjin dhe dëmin e mundshëm ekonomik, duke mos e lidhur me “emrin” e personit të akuzuar.
“Për sa i përket peshës së çështjes (duhet të jemi të kujdesshëm në këtë), gjatë punës sonë ne nuk bëjmë ndonjë kategorizim të tillë në raport se kush është personi i pandehur apo personi i akuzuar. Ajo që mund të them për këtë çështje janë dy elementë: Është numri i fakteve penale, që është numër i lartë, numri i procedurave që janë zhvilluar të dyshuara në kundërshtim me ligjin; dhe vlera e dëmit të mundshëm ekonomik dhe vlera totale që kanë të gjitha këto procedura. Sigurisht, këta dy elementë e bëjnë këtë çështje të rëndësishme. Dhe mendoj që kjo është pjesa më e rëndësishme e çështjes, pavarësisht emrit të personit të dyshuar apo të akuzuar,” u shpreh Braho.
Thelbi i konfliktit: përgjimet dhe ndikimi mbi dëshmitarët
Në lidhje me manipulimin e dëshmitarëve, prokuroria ka paraqitur procesverbalin e transkriptimit të përgjimeve të lejuara me vendim gjykate. Ky material evidenton frikën e një prej dëshmitareve të pyetura nga SPAK, e cila përmendi kërcënime nga “të fortë”, nga zyrtarë, dhe tentativat për ta korruptuar me para. Prokurori Dritan Prençi sqaroi se bëhet fjalë për një dëshmitare, familjarët e së cilës kanë marrë telefonata kërcënuese dhe i është bërë ofertë për t’u blerë me para, me kusht që të ndryshonte avokatin.
“Te relacioni dhe provat mbështetëse të relacionit ne kemi paraqitur procesverbalin e transkriptimit të përgjimit të bisedave, të lejuara me vendim të gjykatës, të datës 20.11.2025, në orën 12:23:35. Ne e kemi paraqitur si provë. Në përmbajtje të këtij transkriptimi rezultojnë të dhëna për intimidimin e personave… Ka përmbajtje, që zonja është e frikësuar, përmend edhe emrat se nga kush është frikësuar, emër zyrtari, por edhe persona të fortë në rang grupesh të tjera. Ajo përmend tundimin nëpërmjet korrupsionit që të ndryshojë theniet apo edhe të zëvendësojë mbrojtësin e saj me një mbrojtës të pëlqyer nga personat që i vetofrohen,” u shpreh Prençi.
Prençi ndau qartë natyrën e intimidimit, duke theksuar se ai vinte nga persona jozyrtarë, të cilësuar si “të fortë”, dhe nga persona zyrtarë, pjesë e kabinetit të ministres së energjisë.
“Atëherë, në përmbajtje të asaj çfarë ka prodhuar ky transkriptim i bisedave të përgjuara, bëhet fjalë për intimidim nga persona jozyrtarë. Aty përmendet ‘të fortë’, e përmend vetë zonja, pra persona jozyrtarë. Pastaj, nga personat zyrtarë bëhet fjalë për persona nga kabineti i ministrit, është e shkruar,” u shpreh Prençi.
Prokuroria ka vendosur kufizimin e informacionit për shkak të sekretit hetimor dhe hetimeve që vazhdojnë. “Ne nuk mund të deklarojmë më shumë, sepse, siç e thashë, ju them me përgjegjësi të plotë që hetimet kanë vijuar në maksimum me intensitet edhe në drejtim të sqarimit të secilës rrethanë apo të dhënë të krijuara, qoftë edhe në drejtim të kësaj që po diskutojmë. Pra, për shkak të ruajtjes së sekretit hetimor, të asaj çfarë ne kemi vijuar pas momentit të paraqitjes së kërkesës përpara jush, ne nuk mund të ekspozojmë pjesë të hetimit, pasi hetimi është akoma i fshehtë, nuk kemi veprime të hapura,” deklaroi Prençi.
Shefi i SPAK, Klodian Braho, sqaroi deputetët se masat mund të caktohen edhe mbi bazën e rrezikut, por në këtë rast ka “rast dhe të dhënë konkrete” që ngrenë dyshimin në një nivel më të lartë.
“Provë konkrete, e cituam, është procesverbali i përgjimit…. Masat e sigurimit mund të caktohen pa pasur fare një provë të tillë, thjesht duke argumentuar një rrezik të mundshëm. Këtu jo thjesht është i mundshëm, por ajo provë për ne është e mjaftueshme për ta provuar dhe në një shkallë më të lartë. Patjetër, nuk është e provuar përtej çdo dyshimi, por e përmbush standardin e dyshimit të arsyeshëm, që dëshmitarët dhe të pandehurit, të cilët nesër mund të jenë edhe bashkëpunëtorë të drejtësisë, nuk i dihet, po kërkohen të ndikohen me presion, me joshje, apo të tjera me radhë. Pra, duke iu referuar vetëm përmbajtjes së bisedës telefonike,” u shpreh Braho.
Dritan Prençi ka pranuar se po verifikohet edhe një bisedë tjetër e përgjuar mes një të pandehuri tjetër dhe një personi ndërveprues, që ende nuk është pyetur si dëshmitar.
“Kemi një bisedë të përgjuar mes një personi të marrë të pandehur bashkë me të pandehurën ministren Belinda Balluku, dhe një personi tjetër që bashkëbisedon me të, që është përsëri person ndërveprues. Ajo do të pyetet me statusin e dëshmitarit, pra nuk është pyetur deri në këtë moment.”
Bisedat e siguruara nga SPAK nëpërmjet përgjimeve janë thelbësore në kërkesën e prokurorëve për arrestimin e ish-zv.kryeministres, pasi tregojnë, sipas SPAK-ut, se shqetësimi nuk është “hipotezë politike”, por vijimësi veprimesh që, nëse verifikohen, rrezikojnë themelin e çdo procesi penal: dëshminë.
Dyshimet për motive politike të hetimit bien
Prokuroria dhe mbrojtja e Ballukut kanë shmangur argumentin e sfondit politik. Sipas citimeve në raport, prokurori Dritan Prençi deklaron se as vetë Balluku dhe as mbrojtja e saj nuk kanë ngritur pretendim për motiv politik, as në prokurori dhe as në gjykatë.
“Shtetasja Belinda Balluku… nuk ka pasur asnjë pretendim të tillë të ngritur, qoftë përpara organit procedues, prokurorisë, qoftë përpara gjykatës, kur ka vijuar me pyetjen nga ana e gjykatës. Pra, nuk kemi një pretendim të tillë,” u shpreh Prençi.
Në të njëjtën linjë, sipas raportit, ishte edhe avokati Ardian Kalia.
“Sikurse e relatuar qe në fillim të prapësimeve tona ose në qëndrimin me shkrim ndaj kërkesës së prokurorisë, nuk përmenda në asnjë rresht një arsye të kësaj natyre,” tha ai.
Në planin politik, kjo pjesë është e rëndësishme pasi i heq mazhorancës alibinë e “përndjekjes politike” dhe zhvendos çështjen tek tema e ndikimit mbi dëshmitarët dhe provat.
Megjithatë, pavarësisht se kanë kaluar disa muaj nga zbulimi i telefonatave intimiduese, prokuroria nuk ka vepruar me arrestime të personave që kanë kërcënuar dëshmitarët. Është zbuluar në media emri i vartëses së Belinda Ballukut, zyrtarja me iniciale M.K, e cila ka pranuar se është kërcënuar.
Mazhoranca po tenton të shtyjë votimin në parlament dhe ende nuk ka dalë me një qëndrim zyrtar për imunitetin e Belinda Ballukut. Deputetët socialistë po presin një urdhër nga Edi Rama se si duhet të votojnë, ndërsa ndërkombëtarët po ushtrojnë presion për një votë pro SPAK në parlament.
“`