Spanjë: Ndalohet burka në dy qytete, e majta kundërshton vendimin
Dy qytete në Kosta del Sol të Spanjës, Rincon de la Victoria dhe Alhaurin el Grande, do të ndalojnë veshjen e burkës. Gratë që mbajnë burka nuk do të lejohen më të hyjnë në ndërtesat komunale.
Propozimi u paraqit nga partia e krahut të djathtë VOX. Politikanët e kësaj partie argumentuan se ndalimi është për arsye sigurie dhe për të “garantuar dinjitetin dhe sigurinë e grave”.
Carlos Chinchilla, këshilltar i VOX në Rincon de la Victoria, e përshëndeti ndalimin, duke deklaruar se “burka nuk do të lejohet në ndërtesat komunale pavarësisht kundërshtimit të së majtës, e cila përqafon një tolerancë të rreme që shkatërron identitetin tonë dhe, ‘rastësisht’, lejon simbolin më patriarkal që ekziston”.
Këto komente erdhën pasi partitë e krahut të majtë e kundërshtuan fuqimisht këtë masë. Në Rincon de la Victoria, ndalimi u miratua me mbështetjen e partisë së qendrës së djathtë PP, të drejtuar nga kryebashkiaku Francisco Salado.