Stuhia përfshin Kaliforninë: Shira të rrëmbyeshëm, erëra të forta, rrëshqitje dherash dhe evakuime në Los Angeles
Një stuhi e fuqishme ka goditur Kaliforninë që nga e mërkura, duke sjellë shira të rrëmbyeshëm dhe erëra të forta. Këto kushte atmosferike kanë shkaktuar rrëshqitje dherash, duke detyruar autoritetet të ndërmarrin operacione shpëtimi dhe të lëshojnë urdhra evakuimi në disa zona të rrezikuara.
Veçanërisht, zonat që ishin prekur më parë nga zjarret shkatërruese në muajin janar, janë vënë në gatishmëri evakuimi për shkak të rrezikut të shtuar nga rrëshqitjet e dheut.
Zyrtarët e Qarkut të Los Anxhelosit njoftuan se ditën e mëparshme ishin lëshuar rreth 380 urdhra evakuimi për banesa të cilat konsideroheshin veçanërisht të cenueshme.
Në Qarkun San Bernardino, zjarrfikësit raportuan se po kryenin operacione shpëtimi për persona të bllokuar në automjetet e tyre. Ky incident ndodhi pasi balta dhe mbeturinat përmbytën një rrugë që të çonte drejt vendpushimit malor Wrightwood, në malet San Gabriel, rreth 130 kilometra në verilindje të Los Anxhelosit. Numri i saktë i personave të shpëtuar nuk u bë i ditur menjëherë.
Zjarrfikësit kryen gjithashtu inspektime sigurie derë më derë, ndërsa në zonë u vendos një urdhër për të qëndruar në shtëpi.
Ndërkohë, zona Little Creek, po ashtu në malet San Gabriel, u vu nën urdhër evakuimi këtë pasdite, ndërsa reshjet e shiut vazhduan pa ndërprerje.
Pamjet e publikuara nga autoritetet lokale treguan baltë dhe mbeturina që përmbyseshin në rrugët e Wrightwood. Video të tjera shfaqnin ujëra të rrëmbyeshëm që kalonin mbi verandat e shtëpive, duke ilustruar qartë rrezikun me të cilin përballeshin banorët.