Ushtria e Sudanit humbet qytetin kyç, el-Fasher në duart e paramilitarëve. Pamjet satelitore tregojnë vrasje masive.
Shefi ushtarak i Sudanit ka konfirmuar tërheqjen e forcave të tij nga el-Fasher, bastion kyç perëndimor, pasi Forcat Paraushtarake të Mbështetjes së Shpejtë (RSF) shpallën kontrollin e plotë të qytetit.
Në një deklaratë televizive, Gjenerali Abdel Fattah al-Burhan tha se ka miratuar tërheqjen në përgjigje të “shkatërrimit sistematik dhe vrasjes së civilëve”. Ai shtoi se kishte rënë dakord me udhëheqësit lokalë për “largimin dhe transferimin në një vend të sigurt, me qëllim mbrojtjen e qytetarëve të mbetur dhe pjesës tjetër të qytetit nga shkatërrimi”.
Organizata e Kombeve të Bashkuara (OKB) ka shprehur shqetësim për raportet lidhur me mizoritë e kryera nga RSF-ja në ditët e fundit dhe ka bërë thirrje për mundësimin e kalimit të sigurt për civilët e bllokuar. RSF-ja ka mohuar akuzat për vrasjen e civilëve.
Rënia e el-Fasher mund të konsiderohet një pikë kthese e rëndësishme në luftën civile të Sudanit, e cila ka shkaktuar dhjetëra mijëra viktima dhe ka zhvendosur rreth 12 milionë njerëz që nga prilli i vitit 2023.
Pushtimi i qytetit i jep RSF-së kontrollin mbi të pesë kryeqytetet shtetërore në Darfur, duke konsoliduar kështu administrimin e saj paralele, veçanërisht në Nyala, kryeqytetin e Darfurit të Jugut.
Studiues nga Shtetet e Bashkuara kanë raportuar zbulimin e provave të vrasjeve masive pas marrjes së kontrollit të el-Fasher nga RSF-ja nga ushtria sudaneze. Laboratori i Kërkimeve Humanitare në Universitetin Yale thotë se imazhet satelitore tregojnë grumbullime që duken si trupa njerëzorë pranë automjeteve të RSF-së dhe një muri që rrethon qytetin. Sipas studiuesve, imazhet konfirmojnë gjithashtu se RSF-ja ka pushtuar të gjitha pozicionet ushtarake.
Lufta civile në Sudan ka vazhduar për rreth dy vite e gjysmë. Vlerësohet se të paktën 150,000 njerëz janë vrarë, përfshirë shumë civilë, dhe më shumë se 14 milionë njerëz janë detyruar të largohen nga banesat e tyre.