Katër të vdekur nga sulmi amerikan ndaj një anijeje në Karaibe
Shtetet e Bashkuara kanë kryer sulmin e 47-të ndaj një anijeje, e cila dyshohet se ishte e përfshirë në trafik droge, duke lënë këtë herë të vdekur katër persona. Njoftimi i së mërkurës e çon numrin e përgjithshëm të viktimave në fushatën e bombardimeve të anijeve, e njohur si “Operacioni Shtiza Jugore”, në rreth 163.
Komanda e SHBA-së për Amerikën e Jugut (Southcom), e cila mbikëqyr operacionet ushtarake në Amerikën Latine dhe Karaibe, e përshkroi sulmin si “zbatim të presionit gjithëpërfshirës dhe sistemik mbi kartelët”.
“Më 25 mars, nën drejtimin e Komandantit të #Southcom, Gjeneral Francis L. Donovan, Task Forca e Përbashkët Poli i Jugut kreu një sulm vdekjeprurës ndaj një anijeje që vepronte nën përgjegjësinë e një organizate të caktuar terroriste”, shkroi njësia në mediat sociale.
“Inteligjenca konfirmoi se anija po udhëtonte përgjatë rrugëve të njohura të trafikimit të drogës në Karaibe dhe ishte e angazhuar në aktivitete të trafikimit të drogës”, thuhej në deklaratë. Nuk u dhanë detaje të mëtejshme për të përcaktuar se cilës ‘organizatë terroriste’ i përkiste anija ose kush ishte në bord.