Izraeli sulmon Bejrutin, Trump reagoi: Nuk duhej të ndodhte, jemi pranë një marrëveshjeje paqeje
Presidenti i SHBA-së, Donald Trump, ka reaguar ndaj sulmit ajror izraelit në Bejrut, duke deklaruar se ky veprim nuk duhej të kishte ndodhur, veçanërisht në një moment kur, sipas tij, ekziston mundësia për një marrëveshje paqeje në rajon.
Në një postim në platformën Truth Social, Trump theksoi se Izraeli ka të drejtë të mbrojë veten, por shtoi se sulmi në fjalë ishte “shumë i vogël dhe i pakuptimtë”.
“Sidomos në një ditë të veçantë kur jemi kaq afër një marrëveshjeje paqeje me Iranin, ky sulm nuk duhej të kishte ndodhur,” shkroi ai.
Trump shtoi se Shtetet e Bashkuara dhe Irani janë “shumë afër një marrëveshjeje që do të sjellë paqe në rajon, përfshirë Libanin”, duke u bërë thirrje të gjitha palëve të shmangin përshkallëzimin e mëtejshëm të situatës.
Ai theksoi se nuk duhet të ketë më sulme, as nga Izraeli, as nga “çdo palë tjetër”, duke e cilësuar momentin aktual si një mundësi për të hapur rrugën drejt stabilitetit.
“Ky mund të jetë fillimi i një paqeje të gjatë dhe të bukur. Le të mos e prishim atë,” përfundoi Trump në mesazhin e tij.