Sulm me raketa ndaj Kievit, shpërthime të fuqishme në kryeqytetin ukrainas
Kryeqyteti i Ukrainës, Kievi, u vu në shënjestër të një sulmi me raketa në orët e para të mëngjesit. Sirenat e alarmit për sulm ajror u aktivizuan në të gjithë qytetin, duke detyruar banorët të strehohen në bunkerë dhe strehimore.
Sipas raportimeve nga terreni, pak pasi u dha alarmi, mbi qytet u dëgjua zhurma e raketave, e ndjekur nga të paktën dy shpërthime të fuqishme. Shumë qytetarë braktisën banesat dhe u drejtuan drejt zonave të sigurta në pritje të përfundimit të sulmit.
Deri tani, autoritetet ukrainase nuk kanë publikuar informacione zyrtare mbi zonat e goditura apo mbi numrin e mundshëm të viktimave dhe dëmeve materiale. Situata në Kiev mbetet e tensionuar, ndërsa shërbimet e emergjencës dhe mbrojtjes civile vijojnë monitorimin e zhvillimeve.
Sulmi vjen në një kohë kur lufta në Ukrainë ka hyrë në vitin e pestë dhe intensiteti i bombardimeve nga të dyja palët është rritur ndjeshëm, duke sjellë pasoja të rënda për popullsinë civile.