Ngjarje e rëndë në Peru, persona të paidentifikuar qëllojnë me armë zjarri ndaj kandidatit për president
Një ngjarje e rëndë ka ndodhur në Peru, ku persona të paidentifikuar kanë qëlluar me armë zjarri ndaj makinës së kandidatit për president, Rafael Belaunde. Sulmi ndodhi ndërsa ai gjendej në komunitetin Cerro Azul, në jug të Limës, siç raportoi policia vendase.
Për fat të mirë, Belaunde dhe shoferi i tij nuk u plagosën.
Sipas shefit të policisë, gjeneral Oscar Arriola, personat që kryen sulmin udhëtonin me një motor dhe hapën zjarr ndaj automjetit të liderit të Partisë së Lirisë Popullore. Policia konfirmoi përmes një postimi në platformën X se nga të shtënat nuk pati viktima.
Gjenerali Arriola shtoi se politikani, i cili mbështet ideologjinë e djathtë, u ka deklaruar autoriteteve se nuk kishte marrë kërcënime më parë.
Rafael Belaunde, 50 vjeç, është kandidat në zgjedhjet presidenciale të planifikuara për t’u mbajtur më 12 prill 2026. Megjithatë, rezultatet e tij aktuale në sondazhe tregojnë mbështetje me shifra njëshifrore.
Ai është gjithashtu nipi i ish-presidentit të Perusë, Fernando Belaunde Terry, i cili shërbeu dy mandate (1963–1968 dhe 1980–1985).