Sulm rus në Kharkiv, një i vdekur dhe disa të plagosur; Moska pretendon se ka rrëzuar 187 dronë ukrainas
Një person ka humbur jetën dhe të paktën nëntë të tjerë janë plagosur si pasojë e bombardimeve ruse në qytetin e Kharkivit, në verilindje të Ukrainës, sipas autoriteteve lokale.
Kryebashkiaku i qytetit, Igor Terekhov, deklaroi se sulmi goditi një zonë banimi, ku forcat ruse përdorën bomba të drejtuara ajrore. Gjatë operacioneve të kërkim-shpëtimit, ekipet e emergjencës nxorën nga rrënojat trupin e një burri që kishte mbetur i bllokuar në një ndërtesë të shkatërruar.
Kreu i administratës ushtarake të rajonit të Kharkivit, Oleg Sinegubov, konfirmoi gjithashtu se nga sulmi i zhvilluar gjatë natës mbetën të plagosur të paktën nëntë persona.
Në një zhvillim paralel, Ministria Ruse e Mbrojtjes njoftoi se sistemet e saj të mbrojtjes ajrore kanë rrëzuar 187 dronë ukrainas gjatë natës në territore të ndryshme të Rusisë, përfshirë edhe rajonin e Moskës.
Sulmet dhe kundërsulmet ajrore vijojnë të thellojnë tensionet mes dy vendeve, ndërsa lufta në Ukrainë vazhdon të shkaktojë viktima dhe dëme në infrastrukturën civile.