Katër të vdekur dhe dhjetëra të plagosur pas sulmit rus me dronë dhe raketa në Kiev
Kryeqyteti ukrainas, Kiev, ka përjetuar një natë të vështirë pas një sulmi masiv nga forcat ruse, i cili ka goditur lagje të qytetit dhe ka shkaktuar viktima civile. Lajmin e ka bërë të ditur Presidenti ukrainas, Volodymyr Zelensky.
Sipas tij, katër persona humbën jetën, ndërsa dhjetëra të tjerë mbetën të plagosur, përfshirë fëmijë dhe një grua shtatzënë. Sulmi përfshiu rreth 430 dronë dhe 18 raketa, duke përfshirë raketa balistike dhe tokë-ajër, të cilat goditën pallate, ndërtesa dhe infrastrukturë civile. Madje, edhe Ambasada e Azerbajxhanit në Kiev u dëmtua nga fragmente raketash.
“Ky ishte një sulm i llogaritur qëllimisht, i cili synonte të shkaktonte dëme maksimale për popullsinë dhe infrastrukturën civile,” shkroi Zelensky në një postim në X. “Ukraina po u përgjigjet me forcë të gjerë, dhe bota duhet t’i ndalojë këto sulme ndaj jetës njerëzore përmes sanksioneve,” tha ai.
Sulmet nuk u përqendruan vetëm në Kiev, por prekën edhe rajonet e Kharkivit, Odesës dhe Sumy, ku u përdorën raketa Zircon. Ministri i Brendshëm ukrainas, Igor Klimenko, raportoi progresin e operacioneve të shpëtimit dhe ndërhyrjeve të emergjencës në zonat e goditura.
Presidenti Zelensky falënderoi gjithashtu stafin e emergjencës dhe Forcat Ajrore të Ukrainës për mbrojtjen efektive, duke theksuar nevojën për sisteme shtesë mbrojtjeje ajrore dhe raketa interceptuese, me ndihmën e partnerëve ndërkombëtarë.