Dhjetëra të vdekur në një sulm xhihadist në Nigeri
Militantët e Shtetit Islamik të Afrikës Perëndimore (ISWA) vranë dhjetëra njerëz, përfshirë ushtarë, të mërkurën në mbrëmje në shtetin Borno, në verilindje të Nigerisë. Ky sulm vjen mes dhunës në rritje në vendin më të populluar të Afrikës dhe presionit ndërkombëtar për çështjet e sigurisë kombëtare.
Disa nga viktimat po punonin në urën Wajiroko, e cila lidh qytetet Biu dhe Damboa. Ura, e cila u shkatërrua nga xhihadistët vitin e kaluar, po rindërtohet. Punëtorët po ktheheshin në bazën e tyre në Sambon Gari, rreth pesë kilometra larg, për të kaluar natën kur ndodhi prita.
Ky sulm ndodhi dy ditë pas një tjetër incidenti, që i atribuohet ISIS-it, ku u vranë nëntë ushtarë nigerianë dhe 10 të tjerë u zhdukën, në periferi të qytetit Damasak, pranë kufirit me Nigerin.
ISIS, i cili u formua pas ndarjes së Boko Haram në vitin 2016, ka përqendruar sulmet e tij kryesisht ndaj forcave të sigurisë, por edhe civilët nuk janë kursyer nga veprimet e tyre në zonë.
Ndonëse niveli i dhunës xhihadiste kishte rënë gjatë dekadës së fundit, aktivitetet e saj janë përhapur edhe në vendet fqinje si Nigeri, Çad dhe Kamerun. Megjithatë, ka shqetësime të shtuara për një rigjallërim të dhunës në pjesë të verilindjes së vendit, ku grupet xhihadiste vazhdojnë të jenë në gjendje të kryejnë sulme vdekjeprurëse pavarësisht operacioneve ushtarake të viteve të fundit.
Që nga shpërthimi i kryengritjes xhihadiste në Nigeri në vitin 2009, më shumë se 40,000 njerëz janë vrarë dhe rreth 2 milionë janë zhvendosur në verilindje, sipas të dhënave të OKB-së.