“`html
SHBA dhe Izraeli sulmojnë Iranin, mbi 200 viktima, ndërsa iranianët godasin Izraelin dhe vendet e Gjirit. Media izraelite: Khamenei mund të jetë vrarë
SHBA-ja dhe Izraeli kanë nisur sulme raketore ndaj Iranit të shtunën në mëngjes, pas muajsh të tërë “planifikimi të përbashkët”, sipas ushtrisë izraelite. Izraeli deklaroi se sulmet e tij kishin në shënjestër udhëheqësin suprem të Iranit, presidentin dhe kreun e forcave të armatosura.
Presidenti Donald Trump e përshkroi fushatën ushtarake të SHBA-së si “masive dhe në vazhdimësi” dhe u bëri thirrje iranianëve të “marrin në dorë qeverinë tuaj”. Trump akuzoi gjithashtu Teheranin se po punonte për të rindërtuar programin e tij bërthamor pas sulmeve masive të SHBA-së verën e kaluar, të cilat sipas tij kishin shkatërruar plotësisht objektet. Irani thotë se programi i tij bërthamor ka qëllime paqësore.
Teherani iu përgjigj sulmeve duke ndërmarrë një valë të paprecedentë goditjesh drejt Izraelit dhe objektivave amerikane në të gjithë Lindjen e Mesme. Shpërthime u raportuan në disa vende, përfshirë Emiratet e Bashkuara Arabe, Bahreinin dhe Katarin.
Operacioni i përbashkët izraelito-amerikan u krye nga forcat ajrore izraelite. Ministri i Mbrojtjes së Izraelit njoftoi një sulm parandalues ndaj Iranit. Mediat iraniane konfirmuan shpërthimet.
Në kohën e sulmit, Forcat e Mbrojtjes të Izraelit (IDF) lëshuan një paralajmërim kombëtar për të gjithë qytetarët që të qëndrojnë pranë zonave të mbrojtura. “Ky është një paralajmërim paraprak me qëllim përgatitjen e publikut për mundësinë e lëshimit të raketave drejt shtetit të Izraelit,” tha IDF.
Agjencia iraniane e lajmeve Fars raportoi tre shpërthime në qendër të Teheranit. Tym i dendur po ngrihet nga qendra e Teheranit, raportoi agjencia iraniane ISNA. FARS raportoi gjithashtu se raketat goditën lagjen qendrore Jomhouri të kryeqytetit iranian dhe rrugën ku ndodhet Universiteti i Teheranit. Autoritetet në Teheran po inspektojnë të gjitha zonat e prekura dhe kanë rritur masat e sigurisë në kryeqytet.
Zëdhënësi i Gjysmëhënës së Kuqe Iraniane, Mojtaba Khaledi, tha se deri tani 201 persona janë vrarë në sulmet e sotme në vend, raportuan mediat iraniane. Khaledi shtoi se 747 persona janë plagosur, ndërsa 24 nga 31 provincat e Iranit janë goditur.
Inteligjenca amerikane ka vlerësuar se, në rast të një operacioni të suksesshëm për ndryshim regjimi në Iran që do ta rrëzonte Udhëheqësin Suprem të vendit, Ayatollah Ali Khamenei, Trupat e Gardës Revolucionare Islamike (IRGC) me qëndrim të ashpër ka shumë gjasa të mbushnin çdo boshllëk drejtues në afat të shkurtër, ka raportuar CNN.
Sipas mediave izraelite, udhëheqësi Suprem i Iranit, Ali Khamenei, mund të ketë mbetur i vrarë nga një sulm izraelit i kryer më herët gjatë ditës. Megjithatë, Ministri i Jashtëm iranian Abbas Araghchi, në një intervistë për NBC News, deklaroi: “Për aq sa di unë, Udhëheqësi Suprem i Iranit, Ajatollah Ali Khamenei, është ende gjallë.”
Ministria për Europën dhe Punët e Jashtme e Shqipërisë tha se po ndjek me vëmendje situatën në Lindjen e Mesme dhe prej mëngjesit të sotëm është në kontakt me autoritetet e vendeve të rajonit përmes përfaqësive diplomatike shqiptare.
Një dron goditi Aeroportin Ndërkombëtar të Kuvajtit, duke plagosur lehtë punëtorët dhe duke shkaktuar dëme të kufizuara materiale, raportoi agjencia shtetërore e lajmeve e Kuvajtit, ndërsa Irani ka nisur sulme kundër bazave amerikane në rajon. Dubai është vënë në gatishmëri të lartë pas raportimeve për shpërthime në qiell dhe përgjime të mundshme ajrore pranë zonës së Palm Jumeirah. Sipas mediave dhe dëshmive të banorëve, incidentet e para u regjistruan rreth 20 minuta më parë, ndërsa në zonë janë dëgjuar disa shpërthime të forta.
Moska ka dënuar ashpër sulmet amerikane dhe izraelite kundër Iranit. Në një deklaratë zyrtare, Ministria e Jashtme ruse i cilësoi sulmet si “aventurë të rrezikshme” dhe që kërcënojnë rajonin. Sipas Rusisë, kjo “katastrofë” synon “shkatërrimin” e qeverisë iraniane, pasi ajo ka refuzuar t’i nënshtrohet “diktatit” të tyre.
Sipas raportimeve, dëshmitarë okularë kanë dëgjuar të paktën katër deri në pesë shpërthime brenda një periudhe rreth 15 minutash, çka sipas tyre mund të tregojë aktivizimin e sistemeve të mbrojtjes ajrore. Një dëshmitar deklaroi se ka parë një përgjim të mundshëm pranë kompleksit FIVE Palm Jumeirah.
Një video e publikuar nga Protothema.gr tregon flakë dhe shpërthime në qiell, që dyshohet se lidhen me ndërhyrjen e sistemeve të mbrojtjes ajrore. Deri tani nuk ka asnjë deklaratë zyrtare nga autoritetet e Emiratet e Bashkuara Arabe lidhur me incidentin.
Palm Jumeirah konsiderohet një nga projektet më ikonike të Dubait. Ishulli artificial në formë palme, i ndërtuar me rërë dhe gurë, është një nga destinacionet më të njohura turistike dhe rezidenciale në botë, me dhjetëra hotele luksoze, rezidenca dhe atraksione turistike. Në këtë zonë jetojnë rreth 78 mijë banorë dhe ndodhen disa nga resortet më të njohura të qytetit.
Situata mbetet ende e paqartë, ndërsa autoritetet pritet të japin një reagim zyrtar për atë që ka ndodhur në qiellin e Dubait.
“`