Rusia sulmon Ukrainën gjatë natës, pavarësisht përpjekjeve për paqe
Rusia ka vijuar sulmet ajrore ndaj Ukrainës gjatë natës së kaluar, duke u zhvilluar vetëm disa orë pasi presidenti Volodymyr Zelensky njoftoi për një telefonatë “shumë konstruktive” me ekipin negociator të Donald Trump. Ky zhvillim vjen pas tre ditësh bisedimesh në Florida.
Kryebashkiaku i qytetit industrial Kremenchuk, Vitaliy Maletsky, raportoi se qyteti u godit nga një “sulm masiv i kombinuar” që shkaktoi ndërprerje të ujit, energjisë elektrike dhe ngrohjes për një pjesë të banorëve. Deri të dielën në mëngjes nuk ishte konfirmuar asnjë viktimë.
Nga ana tjetër, ministria ruse e mbrojtjes deklaroi se kishte rrëzuar 77 dronë ukrainas në disa rajone.
Sulmet e fundit zhvillohen në një moment kur përpjekjet diplomatike janë intensifikuar. Në Miami u zhvilluan bisedime të detajuara mes delegacioneve ukrainase dhe amerikane, të cilat synojnë hartimin e një plani paqeje të pranueshëm për të dyja palët.
Zelensky u shpreh se bisedimet me të dërguarin e Trump, Steve Witkoff, dhe Jared Kushner, kishin trajtuar mënyrat për të garantuar që Rusia të respektojë çdo marrëveshje të ardhshme.
Përpjekjet e vendeve evropiane për të bindur Uashingtonin të mbështesë propozimet e tyre për garanci gjithëpërfshirëse sigurie për Ukrainën pas luftës, duke përfshirë diskutimin për një forcë të mundshme paqeruajtëse, hasin në kundërshtimin e Presidentit rus Vladimir Putin, i cili e ka konsideruar çdo trupë të tillë “objektiv legjitim”.
Në një deklaratë të përbashkët të shtunën, negociatorët amerikanë dhe ukrainas i kërkuan Rusisë të tregojë “angazhim serioz për paqen afatgjatë”. Witkoff dhe negociatori i ri i lartë i Ukrainës, Rustem Umerov, thanë se kanë rënë dakord për kornizën e marrëveshjeve të sigurisë dhe kanë diskutuar masat parandaluese për të garantuar një paqe të qëndrueshme.