Ushtria amerikane godet dy anije në Paqësor, 5 viktima të raportuara
Ushtria amerikane njoftoi të enjten se ka kryer sulme ndaj dy motoskafëve në Paqësor, të cilët dyshohet se transportonin lëndë narkotike. Si pasojë e këtyre sulmeve, raportohet se humbën jetën tre persona në anijen e parë dhe dy në të dytën. Komanda e Përbashkët e SHBA-së përgjegjëse për Amerikën e Jugut (SOUTHCOM), përmes një postimi në platformën X, deklaroi se “gjithsej pesë persona, të cilët i përshkroi si ‘të përfshirë në trafikun e drogës’, u vranë në këto operacione”. Postimi u shoqërua edhe me materiale filmike të deklasifikuara nga dy sulmet.
Që nga muaji shtator, forcat e armatosura të SHBA-së kanë kryer dhjetëra operacione të ngjashme në Karaibe dhe Paqësor. Gjatë këtyre veprimeve, të paktën 104 persona raportohet se kanë humbur jetën. Ndërkohë, nuk janë paraqitur kurrë prova konkrete se anijet e shënjestruara ishin të përfshira në aktivitete të paligjshme. Ligjshmëria e këtyre operacioneve është vënë në dyshim nga ekspertë dhe Organizata e Kombeve të Bashkuara.