Tajfuni Kalmaegi godet Vietnamin, pas vrasjes së të paktën 140 personave në Filipine
Tajfuni Kalmaegi ka goditur rajonin qendror të Vietnamit të enjten, duke detyruar mijëra banorë të evakuohen përpara ardhjes së njërit prej cikloneve më shkatërruese të vitit.
Gjatë javës, Kalmaegi shkaktoi dëme të mëdha në Filipine, duke lënë të vdekur të paktën 140 persona dhe duke konsideruar 127 të tjerë të zhdukur pas përmbytjeve të shkaktuara nga stuhia.
Tajfuni hyri në Vietnam me erëra që arritën deri në 149 kilometra në orë, sipas Ministrisë së Mjedisit. Një banor i Vietnamit, Vu Van Hao, 48 vjeç, përshkroi forcën e erës për AFP: “Era është aq e fortë sa asgjë nuk i bën ballë.”
Rajoni qendror i Vietnamit, që u godit nga tajfuni, vetëm një javë më parë ishte përballur me vërshime që lanë të vdekur të paktën 47 persona. Zyrtari kryesor i provincës Gia Lai, Pham Anh Tuan, e cilësoi këtë si “një tajfun të madh me kapacitet të tmerrshëm shkatërrues.” Mediat shtetërore raportuan se në këtë provincë u evakuuan mbi 7.000 persona gjatë natës.
Vietnami ndodhet në një nga rajonet më aktive në botë sa i përket cikloneve tropikale. Zakonisht vendi preket nga rreth dhjetë tajfune ose stuhi në vit, por Kalmaegi është stuhia e trembëdhjetë që godet shtetin gjatë vitit 2025.
Ndryshimet klimatike të shkaktuara nga njeriu po bëjnë që ngjarjet e motit ekstrem të jenë më të shpeshta dhe më shkatërruese, sipas të dhënave shkencore.
Kalmaegi kishte goditur fuqishëm Filipinet të hënën, duke shkaktuar dëme në ishujt Cebu dhe Negros, para se të rikthehej në det. Stuhia shkaktoi vërshime të mëdha në Filipine, duke bërë që shteti të shpallë gjendje të fatkeqësisë kombëtare. Më shumë se 500.000 banorë në Filipine u zhvendosën nga shtëpitë e tyre për shkak të stuhisë.
Vietnami, me një bregdet prej 3.200 kilometrash dhe një rrjet prej 2.300 lumenjsh, përballet me rrezik të madh nga përmbytjet. Sipas Zyrës Kombëtare të Statistikave të Vietnamit, fatkeqësitë natyrore gjatë këtij viti kanë shkaktuar vdekjen ose zhdukjen e 279 personave dhe dëme materiale në vlerë prej më shumë se 2 miliardë dollarësh.