Negociatat për paqen: Nesër takim në Kremlin, Putin pret të dërguarin e posaçëm të Trump, Witkoff
Një takim mes Presidentit rus Vladimir Putin dhe të dërguarit të posaçëm presidencial të SHBA-së, Steve Witkoff, është planifikuar për pasditen e 2 dhjetorit, bëri të ditur zëdhënësi i Kremlinit, Dmitry Peskov, në një konferencë për shtyp.
“Po, takimi me Witkoff është planifikuar për nesër. Ai vetë e përmendi këtë dje”, u përgjigj zëdhënësi duke specifikuar se bisedimet do të zhvilloheshin pasdite.
“Presidenti do të zhvillojë gjithashtu disa takime me dyer të mbyllura sot, në përgatitje të kontakteve Rusi-SHBA të nesërme”, shtoi Peskov.
Më parë, The Wall Street Journal raportoi se Witkoff dhe dhëndri i Donald Trump, Jared Kushner, do të udhëtonin për në Moskë të hënën për të vazhduar bisedimet mbi zgjidhjen e krizës ukrainase.