Para takimit me Trump në Florida, Zelensky: Rusia nuk dëshiron paqe, përgjigjet me sulme ndaj përpjekjeve diplomatike
Presidenti i Ukrainës, Volodymyr Zelensky, do të zhvillojë sot një takim në Florida me Presidentin e Shteteve të Bashkuara, Donald Trump. Ky takim bën pjesë në raundin e fundit të bisedimeve me qëllim t’i jepet fund luftës pothuajse katërvjeçare me Rusinë. Takimi do të mbahet në rezidencën e Trump në Mar-a-Lago.
Dy liderët pritet të diskutojnë:
- Një version të përditësuar të planit të paqes të ndërmjetësuar nga SHBA-ja, i cili ende nuk ka marrë mbështetjen e Moskës.
- Propozime specifike për garancitë e sigurisë amerikane për Ukrainën.
Një pikë kyçe e diskutimit do të jetë edhe drafti i ri i planit të paqes me 20 nene. Ky version është një rishikim i planit të mëparshëm me 28 nene, i hartuar nga i dërguari special i SHBA-së, Steve Witkoff, i cili ishte kritikuar se favorizonte tepër Rusinë.
Takimi zhvillohet pas bombardimeve intensive ruse ndaj Kievit gjatë fundjavës. Autoritetet ukrainase njoftuan se një sulm 10-orësh me raketa dhe dronë shkaktoi dy viktima dhe la 32 persona të plagosur. Zelensky i cilësoi këto sulme si dëshmi se Moska “nuk dëshiron paqe” dhe se ato ishin “përgjigjja e Rusisë ndaj përpjekjeve tona diplomatike”.
Presidenti ukrainas pritet të ngrejë në takim çështjen e garancive të sigurisë dhe lëshimeve territoriale, dy tema për të cilat Rusia ka refuzuar deri tani kompromisin. Kontrolli i Donbasit lindor mbetet një nga pengesat kryesore në negociata. Aktualisht, Rusia kontrollon rreth 75% të rajonit të Donetskut dhe rreth 99% të Luhanskut, të njohura së bashku si Donbas.
Zelensky ka sugjeruar së fundmi se krijimi i një “zone të lirë ekonomike” mund të jetë një alternativë e mundshme. Kremlini nuk ka bërë komente mbi ofertën e Zelensky-t për tërheqjen e trupave nga Donbasi, nëse edhe Rusia do të bënte të njëjtën gjë.
Ndryshe, presidenti rus Vladimir Putin ka deklaruar se Ukraina “nuk po nxiton ta zgjidhë konfliktin në mënyrë paqësore”, duke paralajmëruar se Moska do t’i arrijë objektivat e saj me mjete ushtarake nëse diplomacia dështon.
Zelensky ka shprehur optimizëm për planin e ri të paqes, duke e quajtur atë “një dokument themelor për përfundimin e luftës”. Ai tha se drafti 20-pikësh është rreth 90% i përfunduar dhe se synimi është që ai të jetë plotësisht gati.
Nga ana tjetër, Trump në një intervistë për Politico paralajmëroi se Zelensky “nuk ka asgjë derisa unë ta miratoj”, duke shtuar se pret ta shohë draftin e ri gjatë takimit të së dielës. Trump tha gjithashtu se pret që plani të ecë mirë si me Zelenskyn ashtu edhe me presidentin rus Vladimir Putin, me të cilin synon të flasë së shpejti.
Sulmet e fundit ruse kanë shkaktuar dëme të mëdha në infrastrukturën energjetike të Ukrainës. Sipas autoriteteve, rreth 40% e ndërtesave të banimit në Kiev dhe zonat përreth mbetën pa ngrohje. Ministria ruse e Mbrojtjes deklaroi se kishte përdorur armë precize me rreze të gjatë për të goditur objekte energjetike që, sipas saj, përdoreshin për qëllime ushtarake.
Zyrtarë ukrainas thanë se Rusia lëshoi pothuajse 500 dronë dhe 40 raketa drejt Kievit, duke synuar infrastrukturën energjetike dhe civile. Sulmi nxiti gatishmërinë edhe në Poloninë fqinje, e cila aktivizoi avionët luftarakë dhe sistemet e mbrojtjes ajrore, megjithëse më pas u konfirmua se nuk kishte pasur shkelje të hapësirës ajrore polake.
Ndryshe, Ministria ruse e Mbrojtjes njoftoi se sistemet e saj të mbrojtjes ajrore kishin rrëzuar pothuajse 200 dronë ukrainas mbi disa rajone të Rusisë, përfshirë tetë mbi Moskë.